Dateianhänge: |
Beitritt INS.rtf (5 kB) |
Töövt un glöövt hebbt de Plattdüütschen al lang. Un faken hebbt wi dor Recht mit hatt: Bit vundaag is Plattdüütsch een lebennig Spraak bleven, un dat schall ok so blieven. Wat dorför nödig deit? Töven un Glöven bringt nich veel. Snacken is dat eerste. Dat anner is nochmal snacken. Aver denn hört dor ok noch anners wat to: Een Spraak mutt nich blots snackt warrn, nee: Se mutt ok ünnersöcht, dokumenteert, utstellt un löövt warrn. Un op düt Rebeet deit dat Institut för nedderdüütsch Spraak e.V. in Bremen een Bült. Hier hebbt de Mitarbeiters
- 18.000 Böker un anner Medien op un över Plattdüütsch opheegt,
- Antwurten op Dien Fraag över Plattdüütsch praat,
- elkeen Johr in mehrere Prieskommischoonen mitarbeit, de plattdüütsch Schrieverslüüd, Verlegers un Theaterspeelers utteekent,
- Wöörböker, Vördrääg, Literatureditschoonen, Autorenlexika usw. rutbröcht, de de Universitäten un ok de enkelten Vereene alleen nienich op de Reeg kregen harrn,
- de Geschäftsstääd för den Bunnesraat för Nedderdüütsch inricht – de Di un Dien Platt in Düütschland un in de EU vertreden deit.
Dat INS is een Institutschoon, de de Plattdüütschen twüschen Ems un Oder, twüschen Eider, Ruhr un Havel tosamenhöllt. Tred dor mit in – tosamen künnt wi wat beschicken! Wat Du dor anners noch vun hest:
- Över 40 Böker un Broschüren gifft dat wat billiger,
- Hauptversammeln eenmal in’t Johr – mit een interessanten Vördrag un aktuelle Informatschoonen över Plattdüütsch hüüt – un een lütte Överraschung,
- Lüüd kinnenlehrn, de över ehrn egen platten Töllerrand över wegkiekt.
- Du giffst een Vereen Stöhn un Hülp, de Plattdüütsch achter’n Aven rut un in de globaliseerte Welt rinstüürn deit!
Nich vun Töven un Glöven, nee: Vun Sporen un Wohren kummt’ Hebben vun her! Markst Müüs? Wenn Du noch Fragen hest – mell Di bi Heiko Frese ünner Tel. 04 13 1 / 69 90 39 oder h-frese@web.de oder kiek ünner www.ins-bremen.de – anners kannst Du furns dat Bitrittsformular utfüllen un us tostüürn!
Heiko Frese, Biraatsvörsitter vun dat INS
Anlage: Beitrittserklärung zum Verein "Institut für niederdeutsche Sprache e.V."
__________________________________________________________________________________________________________________________