Geiht üm: Plattdüütsch in Hamborg-Nord

„Mol kieken, wat den Baas vun dat Bezirksamt infallt“, harrn sick de beiden swatten Bezirksafordneten Gebhard Kraft un Christine Brüggemann dach un denn harrn se sick een Kopp mookt un mol een Grote Anfraag stellt. Woans dat dat Amt mit uns plattdüütsche Spraak holln deit. Bi de Antwort is denn ook wat rutkamen:

• Wenn twee heiroten wüllt, denn köönt se ook op Plattdüütsch Hochtied holln.
• Wenn een na Hamborg-Nord treckt, denn kann he sick ook op Plattdüütsch anmelln.
• Andrag op Soziolhülp, dat geiht ook op Platt.
• Sülvs een Buuandrag kann een op Plattdüütsch stelln.
• Un wenn een wat to en Bebauungsplan seggen will, denn kann he dat ook op Platt doon.

Över'n Duumen pielt sünd dat 50 Lü, de in dat Bezirksamt Plattdüütsch snacken köönt. Un dat Blad för de Lü vun dat Amt hett ook faken wat op Platt binnen.

„De Baas vun dat Amt hett sick bi sien Antern nich slecht slagen“, seggt Gebhard Kraft dorto. Op Anregen vun de CDU-Anfraag will dat Amt sick nu ook för een Översicht för dat Internet insetten, wo de veelen plattdüütschen Krings, Speeldeels un anner Aktivitetens to finnen sünd. Bito is in de Kulturdatenbank nix binnen.

„Wi köönt obers noch mehr doon för uns Spraak“, meent Kraft. „Scheun wöör dat, wenn dat Bezirksamt ook een plattdüütsche Huussied in't Net harr. Un wenn mol niege Schillers in een Amt mookt warrn, denn köönt de jo op beide Spraken sien. Dormit kriggt uns Amt wedder 'n lütt beten mehr Charme. Anner Gemeenen mookt sogor plattdüütsche Ortsschillers an de Straat.“

Nu gifft dat op de neest Mööt vun de Bezirksversammeln de Debatt to de Anfraag. An'n 9. September. Klor, op Plattdüütsch!

De Lü, de Anfraag un de Antwort hebben wulln, de bruukt blots an de CDU-Frakschoon to mailen (Post@cdu-nord.de) oder dor anropen.