25.11.2005 - (5173) "Plattdüütsch Dag" in'n Kraichgau
 
            PLATTNET-Nachrichten - 25.11.2005 -  3
 
 

                       

   

„Plattdüütsch Dag“ in Dühren bi Sinsheim in'n Kraichgau

 

In de Mundoort vun de dore Kant - op'n Weg vun Heidelbarg noh Stuttgort - heet dat "Diere" un "Sinße". Liekers warrt dor ook Platt snackt. De Preester vun de evangeelsche Karkengemeen (Evangelische Landeskirche in Baden) heet Dietmar Coors un stammt ut Breemen. Siet üm un bi fief Johren mookt he in sien Gemeen en "Plattdüütschen Dag", jümmers in de Tiet, wenn den Januarmoond bi lütten de Puust utgeiht. Anner Johr (2006) al beeten freuher, wenn de Januar noch Luft hett: an'n 22.01.2006.

De Liturgie (kannst dor ook "dat Programm" för seggen): Klock 10 gifft dat en Gottsdeenst (op Platt- un Hoogdüütsch; dat Hoogdüütsche vun weegen de veelen Manns- un Fruunslüüd ut de dore Kant, de sick op'n plattdüütsch Kierl oder Fruu inlooten hebbt: wat de ook beeten wat mitkriegen köönt!). Achteran (Klock 11) warrt bosselt. Un denn gifft dat noch en noorddüütsch Middageeten. Coors is ut Breemen, un dorüm gifft dat Kohl & Pinkel - un veel Tiet för Klönsnack un ook en lütt Biprogramm.

Bi'n Gottsdeenst is de Kark jümmers knapp ünner rammelvull - wohrschien poor miehr Lüüd as anner Sünndoog. An'n 22. Januar 2006 is Prof. Bernd Jörg Diebner, Redaktöör vun DE KENNUNG - Zeitschrift für plattdeutsche Gemeindearbeit, as Prediger - un ook för't Biprogramm - mit bi.

Twee Sünndoog looter - an'n 5. Februar 2006 - gifft dat dicht bi Dühren in't Gemeendehuus vun de evangeelsche Karkengemeen in Baiertal nochmool en plattdüütschen Dag. Baiertal heurt to Wiesloch, dicht bi SAP in Walldorf, wat Hälft vun all dat afkasseert, wat Heidelberger Druckmaschinen an Stüürn betohlen mutt. (Walldorf kasseert SAP af un is de eenzi Gemeen in Düütschland, de dat Geld to'n Finster ruutsmieten kann.) Dor gifft dat denn ook en Greunkohl-Eeten mit Wost un Swiensback un en plattdüütsch Biprogramm. Utricht' warrt dat von Olli Pluskota ut Harborg-Appelstedt un sien Fruu. Düt Eeten steiht in de Traditschoon vun de plattdüütschen Middageeten un Obenden in Baiertal siet 1979 - ohn' dat' dor en Vereen för geeben deit. Dat een oder anner in düsse Welt löppt ook ohn' Vereens-Grünnen. För dat literorische Biprogramm is B.J.Diebner orgoniseeren tostänni. Dat gifft ook in düsse Kant (dicht bi'n Süüdpool) en poor Lüüd, de to sowat - to plattdüütsch Buuten-Kultuur - beeten wat tostüürn köönt.

 

(B.J. Diebner)

  

________________________________________________________________________________________________________________________
 
PLATTNET.de   Nachrichten
Volker Holm, Buchenweg 35, D-22926 Ahrensburg, Tel. 49-4102-4739108 - www.plattnet.de
PLATTNET.de ist ein Dienst des Zentrums für Niederdeutsch in Holstein (www.zfn-ratzeburg.de)
Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.
Das System wird ständig von "Norton AntiVirus" überprüft, um die Verbreitung von Viren zu vermeiden!
Wer in Zukunft keine e-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de