„Plaisier up Platt“ auf der niedersächsischen Landesgartenschau Winsen (Luhe)

„An’n Fridag weer dat sowiet: Ministerpräsident Wulff hett de Lannesgoornschau Neddersassen in Winsen (Luhe) fierlich in Gang sett. De lange Winter hett dorför sorgt, dat bet toletzt schüffelt un harkt un plant warrn müss, aber nu sünd doch öberall bunte Blomen un Planten to seihn. Bet to’n 15. Oktober hebbt de Lüüd denn Tiet, allens antokieken.

Dat gifft aber nich bloots wat to kieken – nee, de Plattsnackers ut Winsen un ümto warrn dorför sorgen, dat dat ok wat to hören gifft: Plattdüütsch ut de Region! Vun nu an heet dat jeden Mittwoch vun half veer bet fief „Plaisier up Platt“. Denn ward speelt un sungen, denn ward vörleest un danzt – jümmers en anner Programm mit anner Lüüd. En half Johr lang al hett Herbert Timm, de Vörsitter vun den Vereen „För Platt e. V.“ un ehrenamtliche Plattdüütschbeopdragte vun’n Landkreis Horborg, tosamen mit Schrieberslüüd, Vörleesers, Leedermakers, Muskanten, Schoolmesters un mit Heimatvereene un Theatergruppen dat Programm utklamüstert. En grote Bühn steiht dorför praat, un bet to 450 Tohörers findt dorvör Platz.

Nu töövt se alltosamen, dat dat We’er düt Johr so goot is, dat düchtig veel Lüüd den Weg na Winsen (Luhe) findt. Is kloor, dat de Plattsnackers ut Hamborg, Bremen, Sleswig-Holsteen, Meckelnborg un Neddersassen sik den Mittwoch utsöken doot, wenn se de Lannesgoorschau besöken wüllt!“ (Herbert Timm)

Dat Programm is natolesen in de PDF-Anlaag.

Keen mehr weten will, kann nafragen bi Herbert Timm:

timmwulfsen@aol.com