De hele plattdüütsche Welt bi NDR Online

Wi snackt platt – so schall dat nu ok bi NDR Online heten. Ganz un gor platt schall´t bi http://www.ndr.de/platt/ togahn.

http://www1.ndr.de/ndr_pages_std/0,2570,SPM12460,00.html

Dor kann sik vun nu af an de hele plattdüütsche Welt – vun Niebüll bit New York, vun Helgoland bit Honolulu – drapen. Allens, wat de NDR op Platt paraat hett, is hier to lesen, to hören un antokieken: Vun den Radioklassiker „Hör mal´n beten to“  bit to de Sennungen vun de Fernsehlüüd „Op platt“ (wat fröher maal Talk op platt weer) un „Nües ut Büttenwarder“ mit Jan Fedder und Klaus-Peter Brix is allens op enen Blick dorbi, wat Rang un Namen hett. Wat sünnerlich intressant is: Liekerveel of Hamborg or Namibia  - Plattsnacker öwerall üm unsen Globus köönt sik rigistreern laten ünner http://www.ndr.de/platt/, wat öwer sik sülben vertellen or een Foto vun jüm in´t Nett setten. Se köönt denn op de nüe Platt-Weltkaart inteknen, woneem se tohuus sünd un sodennig anner Plattsnackers as Frünnen finnen un sik mit jüm feine „Mehls“ schriewen.

För de „Jusers“ gifft dat opto noch ´n Barg anner Hülp un Anbott. Se köönt geern för dat plattdüütsch Spraakbook ´n nü Woort tostüren, wat in de Kuntrei begäng is, woneem se ehr „egen“ Platt snackt. Vun „Ackersnacker“ bit „Witscherquast“ – vun Aalbeer bit Zuckeldraff – eenerlei. Allens is för düt Spraakbook to bruken. Un keen weten will, wat dat in de Weltgeschicht Nües gewen deit, de finnt hier ok  - elkeen Dag aktualiseert – de Norichten op Platt! Ok de Historie vun de nedderdüütsche Spraak is hier natolesen:

op Hooch un op Platt. Un denn kann sik elkeen Plattsnacker ok noch de Sennung, de he besünners geern lieden mag, as plattdüütsch „Podcast“ daalropen un jümmers denn hören, wenn em dat am besten in den Kraam passt.

Kiek! Wenn dat nix is ?  Seggt wi doch al lang: De NDR – dat Beste vun´n Noorden!

(NDR Online)