Fehrs-Gill 90 Johr oolt – aver mit Power för Platt!

90 Johr warrt de Literatursellschop oolt, de ehren Naam na den plattdüütschen Dichtersmann Johann Hinrich Fehrs (1838 – 1916) hett. Grund noog, in Itzhoe, wo he in Beroop un Literatur leevt un streevt hett, Fredag, den 6. Oktober, üm Klock 19.00 en Jubiläum to fiern. En wöördigen Rahmen is dor de Saal vun den „Prinzesshoff“ in de Karkenstraat 20, wo ok en Fehrs-Stuuv inricht is.

As Literatursellschop grünnt, geev de Gill wichtige Böker rut so as „1000 Jahre Plattdeutsch“ mit oolt-, middel- und neenedderdüütsche Literaturdenkmalen. To so ‘n Böker tellt Hermann Claudius sien Gedichtband „Mank Muern“ mit impressionist’sche Grootstadtlyrik, Johann Dietrich Bellmanns „Inseln ünner den Wind“ un Peter Martens sien Tour dörch de Literatur „Ook op Plattdüütsch geiht dat goot“. Kloor, dat de Fehrs-Gill ok all de Warken vun Fehrs rutgeven hett, wo ok de grote Roman „Maren“ in to finnen is.

Dat Wiederhelpen vun de Spraak worr en tweet Standbeen, as de Gill de SASS´schen plattdüütschen Schrievregeln ünner de Lüüd bröch. Se kaamt mit goot 20 Regeln ut. De Lüüd hebbt ehr goot annahmen, se warrt ok för de Texten bi den Vörlees-Wettstriet „Schölers leest Platt“ bruukt. Vundaag gifft dat bavento enen „ne’en SASS“, en Plattdüütsch Wöörbook, dat de modernen Fremdsprakenwöörböker as Vörbild hett. Plaant is ok en hannige plattdüütsche Grammatik un en plattdüütschen Rechtschrievoppasser, d.h. en Komponent Plattdüütsch in dat Rechtschrievprogramm op Windows/Office vun de Fa. Microsoft. Ok an enen profeschonellen plattdüütschen Vokabeltrainer denkt de Fehrs-Gill. Man geiht hier mit Power för Platt in de moderne Tiet.

Spraakpolitik is dat drüdde Opgavenfeld. Dat Plattdüütsch in de Europääsche Sprakencharta un in de Sleswig-Holsteensche Lannsverfaten opnahmen, ok in de Scholen beter verankert worrn is, dat reekt de Lüüd vun de Fehrs-Gill sik un vele aktive Hölpers to. Un polietsch inwarken doot se bet op düssen Dag, to ‘n Bispeel över den Sleswig-Holsteenschen Plattdüütschen Raat un den Plattdüütschen Bunnsraat. Düsse Rööd sünd de hööchsten polietschen Vertreders vun de Plattdüütschen in Sleswig-Holsteen or Düütschland.

Den festlichen Avend richt en Reeg Lüüd ut: Schölerinnen un Schölers vun de Fehrs-School in Itzhoe, de Leder singt un Gedichten vördreegt, denn Heiko Gauert, Rekter an de School Silzen, de Statschonen ut dat Leven un Wark vun Fehrs vörstellt, un ok Dr. Reinhard Goltz, de Spreker vun den Plattdüütschen Bunnsraat un Geschäftsföhrer vun dat Institut för nedderdüütsche Spraak in Bremen is. Sien Thema: „Schreven Schrift: To wat de Fehrs-Gill ok morgen noch bruukt warrt.“