Arbeitskring Plattdüütsch in de Kark treckt Bilanz
Ob op Kreisebene or op nordelbische Rebeet de beiden sünd dorbi, wenn dat üm dat Plattdüütsche in de Kark geiht. Gertrude von Holdt-Schermuly ut Niebüll un Pastor Peter Schuchardt ut Bredstedt. Und at sünd nich wenig Opgaven, de to dat Thema op se töven. Beide sünd Vörstandsliddmaten in de Arbeitskring Plattdüütsch in de Kark för Schleswig-Holsteen un Hamborg, Beopdragte för Plattdüütsch in ehr Karkenkreis Südtondern un Husum-Bredstedt, Liddmaten in dat Plattdüütsche Forum NF un de Fördervereen Plattdüütsch-Zentrum Leck. Gertrude von Holdt-Schermuly is dorto noch Vörsittersche vun de Karkenkreis-Synode Südtondern un Predikantin. „Na en dreejährige Utbildung kann ik as Predikantin Gottesdeenste avholen, wat ik ok veel un gern do – ganz oft op platt!“ verklart se wat en Predikantin is.
„Unse
Opdrag vun de Kark is ja op alle Minschen togahen un mit se snacken. Jere Freud
un jere Noot antohören. Un wenn noch so veele Lüüd plattdüütsch bi uns snacken,
denn is dat en grote Hölp op beide Sieden, wenn ok de Paster plattdüütsch kann!“
vertellt Pastor Peter Schuchhardt, de sik en Planstell mit sien Fru Wiltraud an
de St Nicolai-Kark in Bredstedt deelt.
In de
nordelbische Kark hett jere Arbeitskring Plattdüütsch doran mitarbeitet, dat wi
hüüt dat oole un dat niee Testament op platt hebben. Genauso en plattdüütsche
Gesangs- un Gebetbook. Johannes Jessen hett de Bibel in en normale plattdüütsche
Schrift översett so dat jedeen de ok lesen kann.
„Dörch all
disse plattdüütschen Böker hebben wi erst en Plattform kregen, üm in alle
Karkengemeenden dormit arbeiten to köön. Sünnerlich dörch dat plattdüütsche
Gesangsbook köönt wi in alle Karken de glieken Leder singen. Dat is en
verbindende Element!“ freut sik Peter Schuchardt.
Un siet 5
Johr organiseert de Arbeitskring Plattdüütsch ok de Landeskarkendag för
Nordelbien mit. „Letzt Johr in Lübeck weer de schwor to organiseern.
Dat
Ümfeld is
dor nich mehr so plattdüütsch. Dorum ward de nächste plattdüütsche
Landeskarkendag 2008 in Schleswig sien!“ vertellt Gertrund von Holdt-Schermuly.
Op de
Fraag, wi dat denn bi de jungen Pastoren mit Plattdüütsch utsüht is de Antwurt
nich so erfreulich. „Dörch de Generationswessel briggt dor veel weg, denn in de
Utbildung givt dat keen Plattdüütch!“ beduern beide
Karkenlüüd.
„En
Plichtseminar weer nödig!“ fordert von Holdt-Schermuly, „denn bi Hochtieden,
Döpen, Beerdigungen or Goldene Hochtieden ward ganz oft Plattdüütsch wünscht.
Dat is ganz wat Normales un en faste Bestanddeel in unse Karkenleven!“ Peter
Schuchardt givt dorum ok all Bispillpredikten för sien Kollegen rut na dat Motto
„Versöök dat doch mal op Platt!“ He will sien Kollgen hölpen un Moot maken. Un
för de tokamen Tied hett he ok noch Wünsche in sien Arbeitskring Plattdüütsch.
„En plattdüütsche Kinnerbibel un plattdüütsche Losungen för jedeen Dag möten wi
ok noch mal kriegen!“ Ja, man goot, dor sünd noch sunn Lüüd in de
Kark!
(Pressemitteilung von: Günter Fleskes, Plattdüütsch-Zentrum Leck www.plattdeutsches-zentrum.de)
Volker Holm,
Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter
http://archiv.plattnet.de/
PLATTNET.de ist ein Dienst des Zentrums für Niederdeutsch in
Holstein (www.zfn-ratzeburg.de)
Eine Weitergabe der
Adressaten-Daten, vornehmlich für gewerbliche Zwecke, ist
ausgeschlossen.
Wer in
Zukunft keine e-Mail-Informationen von PLATTNET haben möchte, den
bitten wir, uns das in einer kurzen Nachricht mitzuteilen: nieges@plattnet.de