(7039) Plattpartu aktuell in'n März 2007

En schönen Palmsünndag un April, April!, leve plattdüütsche Frünnen!

Man wat ik Se nu vertell, is liekers allens wohr!

Se köönt dat nämli napröven. Un dat is en ganzen Barg!

Uns Websiet Plattpartu hett nämli in düsse Daag Bortsdag -- un dat is al de föffte. An'n 6.April 2002, vör fief Johr, hebbt wi de Siet frieschalt -- mit de allereersten Bidrääg. Bloots dree Maten weern wi denn. Nu heff ik de Bidrääg nochmal dörtellt: 820 sünd dat nu woorn, un de Tall vun Maten un Mitmakers -- Minschen, de bloots eenmal, af un to mal orr ganz faken en Text orr Bild orr Kunstwark schickt -- geiht op de föfftig. Dat harrn wi nienich dacht an'n Anfang, un dat is us en grote Freud.

To ehrn Bortsdag hett sik uns Siet nu putzt. Siet fief Johr harr se datsülvige Design; dat hett sik as praktisch un robust wiest, avers nu hebbt wi dat doch en gaaanz lütt beten ännert. Un noch anneres is nieg, ik tell dat mal op:

De Startsiet hett sik en nieges Kleed antrocken. De Links na de Flacken sünd nu reiner Text. Dat is nüchterner, man ok praktischer, denn nu köönt Se vun de Startsiet glieks de Ünnerflacken (Lübeck, Erinnern usw.) direkt anstüern. De Links wesselt ehr Klöör, wenn Se mit de Muus över fohrt. Wi hööpt, dat dat noch liekso översichtlich is as de fröhere Startsiet.
Op de Startsiet finnt Se en nieges Flack: Platt to Hand. Hier sünd Gedichte un Riemels för ganz konkrete Anläss to finnen. -- De Achtergrund is, dat wi faken Anfragen kriegt: "Mein Opa hat Geburtstag, gibt es da ein plattdeutsches Gedicht, können Sie mir helfen?" usw., faken op Hoochdüütsch. To Wiehnachten versuupt wi reinweg in solk Anfragen: "Aus meiner Kindheit erinnere ich ein plattdeutsches Weihnachtsgedicht, das ging etwa so:... -- Kennen Sie das Gedicht? Können Sie mir helfen, es zu finden?" De Anfragers sünd mehrst Minschen, de Platt nich mehr orr bloots wenig snackt; un sünnerlich düsse Minschen wedder na ehr plattdüütsche Wötteln to helpen, dat liggt us ja an't Hart. Wi hebbt jümmers versöcht, all de Anfragen gerecht to warrn, man faken hebbt wi us wünscht, dat geev en Steed, 'neem all solk Gedichten sammelt weern. De Nafraag dorna is groot. Un denn passeer dat opletzt, dat Brigitte Fokuhl ut Lübeck uns ehr ganze Sammlung vun sülvst maakte Riemels to Hoochtieden un Bortsdaag övergeven hett. Lübeckers kennt ehr un ehr Gedichten wiss; op Smuckbläder sünd de dor faken to köpen. Nu gifft dat de ok för alle in't Internet, denn wi hebbt nu de Saak sülven in de Hand nahmen un düt Flack bi Plattpartu anleggt. Hier wüllt wi all de Gedichten to konkrete Anläss sammeln. Nu, to unsen egen Bortsdag un to de schöne Fröhlingstied, hebbt wi eerstmal stückerwat 8 Riemels vun Fru Fokuhl un vun Gertrud Everding to Boortsdaag, Hoochtied un solk schöne Saken frieschalt. Jümmers wedder kaamt welk dorto. Dat Flack warrt also mit de Tied to en Aart Riemel-Archiv warrn. Ok tradischonelle Riemels sünd hier willkamen! Un wenn Se sülven welk bitodragen hebbt, weet Se ja, woneemhen Se de schicken köönt! :-) Wi freit us.
Plattpartu hett ok en niege Süstersiet kregen: www.vertelln.de. (Alternativ: www.vertellsel.de -- wi sünd ja alle Domain-Hamster!) Op düsse Siet sünd wat längere Prosa-Vertellsel to lesen, de för Plattpartu nich passen doot. Se sünd as PDF-Datein wiest; dorto bruukt Se also den Adobe Reader. As PDFs laat sik de Datein avers ok good drucken. To'n Start sünd dat twee Vertellsel. Dat Vertellsel "Verropen" hett 2005 den Freudenthal-Pries wunnen.
Dat warrt en ruhige Siet ween, 'neem sik nich veel deit. In düssen Rundbreef kriegt Se Bescheed, wenn dor wedder wat Nieges rutkümmt -- liekso as bi de annere Süstersiet www.numanto.de.

So, dat weer de "Bortsdagsparty" vun Plattpartu. Ik verspreek Se, dat wi opneegst wedder "Deenst na Vörschrift" maakt! Denn gifft dat ok wedder köttere Rundbreven. Eerst in fief Johr, to unsen teihnten Bortsdag, wüllt wi wedder so en Opstand maken! Man wenn Se meddewiel bi den Opstand mitdoon wüllt, freit wi us över jeden niegen Maat. Bi Plattpartu köönt wi besünners Maten bruken, de gode politische Texte orr Satiren (Wat in de Welt vörgeiht) orr gode Sakentexte schrievt (t.B. Wetenschap). Ok Biller, Kunstwarken orr Berichten över welk sünd willkamen! Dat Flack Plattdüütsch Künst verhehlt ja doch wenig, dat de Harten vun de mehrsten Mitmakers för Gedichten un Bild-Gedichten slaat. En Gegengewicht is us dor jümmers willkamen! -- Welk Tungslag Ehr Platt hett, is egaal; ok dat Copyright för allens, wat Se an Plattpartu schickt, blifft bi Se sülven.

Bi www.numanto.de hett sik ok wat Nieges daan. Eerstmaal gifft dat dor twee niege Gedichte un een niegen Limerick; avers ok hier hebbt wi sotoseggen anbuut, denn dat gifft nu ünner de Limericks en Afdeel för Schüddelriemels. Mit de Limericks kemen wi ja al so'n beten in de Nehgde vun Spraakspelen, un mit de Schüddelriemels sünd wi nu ganz dor ankamen. Se kennt all Schüddelriemels op Hooch: "Es klapperte die Klapperschlang, bis ihre Klapper schlapper klang" orr "Die Boxer aus der Meisterklasse, die hauen sich zu Kleistermasse" usw. Bloots de Konsonanten in dat Riemelwoort an't Enn dröfft tuuscht warrn. -- Lange Tied heff ik överleggt un dacht, dat güng op Platt gor nich. Op Hoochdüütsch gifft dat Dusende, un ik maak geern welk in'n Alldag. Nu heff ik ok de allereersten op Platt maakt. Richtig good sünd se noch nich, avers villicht löppt sik de Saak noch warm, as mit de Limericks. Wenn Se sülven kreativ sünd, mailt Se mi! --
Un nu noch en Rutfeddern an de kreativen Spraakspeler: Köönt Se sik vörstelln, dat dat plattdüütsche Palindrome gifft? Palindrome sünd Wöör orr Sätz, de "spegelsymmetrisch" sünd, de also vun vörn un achtern leest dat Glieke ergeevt. "Reliefpfeiler" is so en Woort, un en bekanntes Satz-Palindrom is "Ein Neger mit Gazelle zagt im Regen nie". Is dat op Platt överhaupt mööglich? Ik heff dor so min Twievel, man laat mi geern vun't Gegendeel övertügen -- un wöör denn glieks en niege Rubrik bi numanto.de anleggen!

Nu noch amenn de niegen Bidrääg bi Plattpartu in'n Märzmaand. Vun den Wordkurs is nu endlich dat Grundweten ok mit Tricks un Öven kumplett. Dat de Fröhling mit Macht kümmt, markst nich bloots an de Büsch un Bööm, sünnern ok an de Naturnotizen, de sik reinweg ballt -- mit apen Mund staht wi vör de Natuur un wunnerwarkt, as elk Johr nieg.

En groot Bortsdagskind in'n Märzmaand weer Paul Gerhardt, un sowat geiht ja nich vörbi ahn en Wördigen bi us. Rudi Witzke hett en Porträt vun den Lederdichter un Pastoor schreven, un dat Wunnerbore dorbi is: Gerhardt sin Leder klingt in den Bidrag ganz natüürlich op Plattdüütsch, as harr Gerhardt nienich in en anner Spraak dicht.

Mit de to Harten gahn Sage vun't Riederheer in'n Schübarg warrt uns lose Sagen-Reeg foortsett. Jutta Bredow nimmt us mit op en niegen Teken-Rundgang, dütmaal langs de lütten Hüüs vun Lübeck. Un noch mennig anner schöne Bidrääg sünd to finnen. Langsam naht sik ok wedder en grotes Fest; to Oostern warrt dat stückerwat schöne Saken geven!

Nu de Plattpartu-Översicht för den verleden Maand. Op de Links nerrn bruukt Se as jümmers man bloots klicken, dat Se henkaamt.

In'n Märzmaand geev dat düsse niegen Bidrääg op Plattpartu.de:

Computerie:

De Wordkurs hett een nieges Trickkapittel un twee Öven dortokregen. Nu is dat Grundweten kumplett rünnertoladen.

Plattdüütsch Künst:

Lübeck: Jutta Bredow tekent "Lütte Hüüs" (25.3.)

Steinland. Bild-Gedicht vun L. Lüske (18.3.)

Notizen ut'n Aarnmaand. Fotos un Verse (11.3.)

Lübeck: Dat Schabbelhus. Vun K.-H. Nissen (4.3.)

De Welt un Gott:

Merrn in düsse Daag. Passionsandacht ut'n Alldag (25.3.)

Paul Gerhardt. Porträt to sien 400. Bortsdag. Vun Rudi Witzke (11.3.)