12.10.2007 - (7127) Junge Düütschlehrers möten Plattdüütsch ünnerrichten
 
 
              PLATTNET-Nachrichten - 12.10.2007 

 

    

       

                           

  

Junge Düütschlehrers möten Plattdüütsch ünnerrichten

 

„Wat maak ik, wenn ik in de School Plattdüütsch ünnerrichten schall, avers nich plattdüütsch snacken kann?“ Dat fragen sik de jungen Lehrers in jere Utbildung, denn dat Kieler Bildungsministerium verlangt dat vun se.

Na de Erlass „Niederdeutsch in der Schule“ vun 1992 sind de sleswig-holsteenschen Scholen in de Plicht, ok dat Plattdüütsche mit in de Ünnerricht optonehmen. Dat ward denn in Arbeitsgemeenschaften, bi Projektdage or besunnere Fiern maakt. In de Fächer wie Musik un Düütsch warrn plattdüütsche Leder, Riemels un Lesestücken dörchnahmen. Dor ward Theoter speelt, an de Lesewettbewarv „Schölers leest Platt“ deelnahmen un in dat Fach Heimat- un Sachkundeünnerricht de engere Heimat na plattdüütsche Wöör avsöcht. Na en niee Ünnersökung hebben noch rund 80% vun unse Scholen in`t Land plattdüütsch snackende Lehrers in jere Kollegien. Todag is dat also noch nich so ring, man de Tokunft süht slechter ut. Vun de jungen Lehrers könen de meesten keen Plattdüütsch mehr snacken. De Öllern hebben dat nich an jere Kinner wiedergeven.

Man wi schüllt de nu plattdüütsche Ünnerricht geven, wenn se dat sülven nich snacken köönt?

„Ich habe keinen Bezug zum Plattdeutschen. Ich komme aus Nordrhein-Westfalen und habe nie plattdeutsch gesprochen“, vertellt Katrin Kampovski bi en Seminar in dat Plattdüütsch-Zentrum in Leck, „aber ich habe heute Anregungen bekommen, wie ich es machen kann!“

In de sülvige Karv haut ehr Kolleg Markus Loer ut Flensborg: „Ich habe eine positive Einstellung zum Plattdeutschen und finde die Sprache heimisch, aber ich kann sie leider nicht sprechen!“ beduert he.

Liggers möten beide in ehr Düütschünnerricht ok Plattdüütsch mit opnehmen. Dorum sünd siet 2004 alle jungen Düütschlehrers in de Plicht, en Plattdüütsch-Modul to besöken. Dat is en ganze Dag in dat Plattdüütsch-Zentrum Leck, wo se dat bipuult ward. „De plattdüütsche Spraak lehren de Kollgen nich an en Dag, dat geit nich. Avers se lehren bi uns, wi se mit annere Plattsnackers tosamen de Ünnerricht organiseeren!“ vertellt Seminarbaas Ingwer Oldsen, „dat geiht na dat Motto: Wenn ik nich sülven platt snacken kann, denn mutt ik mi Lüüd holen, de dat köönt un mit de tosamen ünnerrichten!“

Dat Bildungsministerium hett dorför extra 2004 en Erlass rutgeven, de de jungen Düütschlehrers to Opgaav maakt, sowat to lehren, sunst warrn se nich för dat twete Staatsexamen tolaten.

„Ich finde das auch richtig, denn Plattdeutsch gehört zu unserem Land und ich habe heute hier in Leck viele Anregungen für meinen zukünftigen Unterricht bekommen“, wiest sik Levke Petersen tofreden. Se is nu an en School in Bargdeheid un is mit dat Plattdüütsche över ehr Oma, de in Niebüll leevt, vertruut. Man mit dat Snacken geiht dat bi Levke Petersen noch en beten stuckelig, viellicht kann Oma ehr mal in de Ferien en beten Nahölp geven.

(Günter Fleskes - Plattdeutsches Zentrum Leck)  

_____________________________________________________________________________________________________________________________________________________

PLATTNET.de   Nachrichten

Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de  ist ein Dienst des Zentrums für Niederdeutsch in Holstein (www.zfn-ratzeburg.de)

PLATTNET.de  Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine e-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de