Marianne Ehlers Vörsittersche vun de Fehrs-Gill

Op de Matenversammeln, de traditschonell in de Tiet vun de Plattdüütsche Bookmess in ’t Huus vun de Carl Toepfer Stiften afhollen warrt, is Marianne Ehlers, de betto Twete Vörsittersche weer, as ne’e Vörsittersche wählt worrn. Heinrich Thies, der 10 Johr Vörsitter weer un bald 70 Johr oolt warrt, wull en beten körter pedden. He is dorüm Tweten Vörsitter worrn. As Kassenmeester is Dr. Rolf Niese wählt worrn, den de Vörstand de Kass al vörlöpig in de Hand geven harr. Niese hett vör Johren as Bunnsdagsafornten mit dorför sorgt, dat de Bunnsrepublik Düütschland de Europääsche Sprakencharta ünnerschrieven dee. Dorna hett he sik bi de Fehrs-Gill mellt, he wull dor Maat warrn.

De dree Rebeden, op de de Fehrs-Gill plöögt, wull de Fehr-Gill in ehren Ünntertitel  düütlich maken. Staats „Vereen för de Stütt vun’t Nedderdüütsche i.V.“ nöömt se sik nu „Sellschop för nedderdüütsche Spraakpleeg, Literatur un Spraakpolitik i.V.“

De nedderdüütsche Spraakpleeg steiht för de Arbeit an dat SASS-Wöörbook, an Listen för Wöör vun ne’e Saken un Begrepen (t.B. to de Themen Auto, EDV, Weertschop, Medizin), an enen Vokabeltrainer, en Rechtschrievkomponent op dat System Windows/Office, en Grammatik un Lehrmateialien för Kinnergoors.

De nedderdüütsche Literatur steiht för dat traditschonelle Rebeet vun de Gill. Heinrich Thies kunn vun kreative un flietige Maten in’t Johr 2007 berichten: Klaus-Peter Asmussen hett dat Book „Planten un Blomen“, en hoochdüütsch-plattdüütsch un plattdüütsch-hoochdüütsch Wöörbook mit sleswig-holsteeensche Plantennaams rutgeven, Bolko Bullerdiek dat Book „Dat Verspreken“. Heinrich Kahl un Ursula Berlik sünd Autoren vun dat Book „Hamborg-Quiz op Platt“. Peter Martens hett dat Book „Plattdüütsch güstern un hüüt“ rutbröcht. Peter Neubert hett sien Wöörbook „Wöhrner Wöör“ överarbeidt. He will dat as elektroonsch Wöörbook in verscheden Schrievwiesen kostenlos anbeden, Hayo Schütte hett dat Book mit Spegelschiev „As ik noch jünger weer …“, Geschichten un Musik up Düütsch un up Platt to lesen un to hören fardigkregen. Heinrich Thies hett dat Book „Schleswig-Holstein - Land twüschen Heven un See“ besorgt. Marianne Ehlers hett Lehrmaterialien för Kinnergoorns tosamenstellt un de plattdüütsche Bökerlist för Bibliotheken rutgeven.

För dat Rebeet Spraakpolitik steiht de Mitarbeit in den Plattdüütschen Bunnsraat (Marianne Ehlers), den Plattdüütschen Raat för Sleswig-Holsteen  (Marianne Ehlers), den Utschuss för Plattdüütsch un Freesch in Sleswig-Holsteen (Marianne Ehlers un Heinrich Thies) un den Biraat vun dat Institut för nedderdüütsche Spraak (Heinrich Thies). Arbeitspunkten weren t.B. en Strategiepopeer för Platt in Kinnergoorns, för en Platt-Professur in Flensborg un för Platt op Oortsschiller in Sleswig-Holsteen (hier is al na de Strategie arbeidt worrn, de eersten hochdüütsch-plattdüütschen Oortsschiller staht).

(Heinrich Thies, 11.11.2007)

Fehrs-Gill - Sellschop för nedderdüütsche Spraakpleeg, Literatur un Spraakpolitik i.V.

Fehrs-Gilde - Gesellschaft für niederdeutsche Sprachpflege, Literatur und Sprachpolitik e.V.

http://www.fehrs-gilde.de