Wiehnachtsboom

 

De Heven hangt

bet op de Eer,

so bleeswoor,

deep un gries;

is wiet un siet

keen Luut to hör’n,

un boomstill

steiht de Luft.

Sneeflocken fallt

so week un lies:

vun’t Holt her

krüppt de Nacht heran,

en Winternacht

mit Küll un Ies.

 

De Snee leggt sick

op Busch un Boom,

deckt sachen

all dat Griese to

un maakt de Welt

nu hell un witt,

gifft allens

en smuck Fierkleed.

 

Ok de lütt Dannboom

in uns’ Goorn

höllt still un tro

de Telgen hen;

he steiht, as weer he

deep in Droom. ­-

Fallt jümmer noch

so week de Snee,

un morgen hebbt wi

achter’t Huus

den allerschöönsten

Wiehnachtsboom!

 

Hans Hansen Palmus

 

(Wiehnachtsbook för Lütt un Groot, Fehrs-Gilde 1983)

    Leve Frünnen vun PLATTNET.de,

                  wi wünscht frohe Wiehnachten un schöne Fierdaag.

              Laat Ju dat gootgahn!

                                                     Volker Holm     

__________________________________________________________________________________________________________________________________________________________________________