Niege Klöör för dat „Schleswig-Holstein Magazin“

 

(pn) Dat „Schleswig-Holstein Magazin“ in’t NDR Fernsehen is een vun de düütschen Regionalsendungen, de de mehrsten Tokieker hett. Dor sünd de, de dorvör dat Seggen hebbt, bannig stolt op. Keen weten will, wat anseggt is in’t Land, de knippst op den Kiekkasten den NDR an: Klock halvig acht an’n Avend. Üm un bi 190 000 Lüüd sünd dorbi elkeen Dag.

Maakt ward dat Magazin vun de Lüüd in’t Kieler Funkhuus, deep in’n Keller - in dat eenzigst Studio, dat ünner „NN“ liggt, as seggt ward. Anfungen hett dat 1985, un jümmers al is dat bi de Sleswig-Holsteeners goot ankamen. Man af un an bruukt en Wahnstuuv niege Klöör, dormit de Gäst nich wegblieven doot, un so is de Dekoratschoon nu gründli renoveert woorn.

Friedrich-Wilhelm Kramer, de Baas vun’t Funkhuus, un Norbert Lorentzen, sien niegen Feernsehbaas, de hebbt dat niegmaakte Studio hüüt vörstellt. Dat is hell un fründli worrn mit warme Klöör. De Inrichten is blaag, witt un root utstafeert: „Sien“ Sleswig-Holsteen-Farven weern em heel wichtig, sä uns Christian Schröder, een vun de Moderatoren, de dat Magazin präsenteern doot. Man nich bloots de Klöör is nieg, ok dat Möbelmang hett dat in sik: Moderator Christian Pipke meen, dat Besünnere weer, dat nu all de, de de Tokiekers to sehn kriggt, an’n een Disch Platz finnen doot.

De Lüüd vun’t „Schleswig-Holstein Magazin“ wüll’t ok in Tokunft to allereerst Informatschoon levern över Land un Lüüd: Politik, Wirtschop, Kultur un Lanneskunn. Se wüllt ok Plattdüütsch nich vergeten: As beto schall dat Bidrääg op Platt geven, un af un an wüllt se ok wedder en Magazin heel un deel op Platt maken. Dorbi schulln ok de Regionalstudios in Flensborg, Heid, Norderstedt un Lübeck ehren Bidrag levern, sä Funkhuusbaas Kramer.

Mit „Dorfgeschichte“ (Dörpsgeschicht) ward dat en niege Reeg geven, de Feernsehbaas Lorentzen vörstellen dä: Jümmers an’n Fridag ward en Dörp utkeken - en Gemeen, de nich mehr as 1000 Inwahner hett. An’n Sünnobend denn maakt sik en Grupp vun Feernsehlüüd op’n Padd dorhen un sammelt Bidrääg, de an’n Maandag achterna sendt warrn. Dor ward seker de een un anner Plattsnacker dorbi ween ...

An’n 7. Januar geiht't los: Denn modereert Christian Schröder mit Gabi Lüße dat „Schleswig-Holstein Magazin“ in’t renoveerte Studio mit en niegen Snack: „Unser Land. Unser Programm.“

 

(Volker Holm, PLATTNET-Narichten)

__________________________________________________________________________________________________________________________________________________________________________