Börgerpries vun de Launborgsche FDP för Plattdüütsch-Forum

(pn) De FDP Hertogdom Launborg hett dat „Plattdüütsch-Forum Kreis Hertogdom Launborg“ den FDP-Börgerpries 2008 tospraken. De twete Vörsitter Prof. Dr. Hans-Georg Priesmeyer un Dieter Ruhland, Baas vun de FDP-Kreisdagfrakschoon, hebbt in Mölln Urkunn un Geldpries an de Sprekersch Helga Walsemann övergeven. In de Fierstünn säen se groot Loff för dat Engagement vun de Priesdrägers un ehr Sprekersch: Helga Walsemann hett al jümmers bannig veel dorför daan, dat Plattdüütsch in’t ganze Land pleegt ward. As ehrenamtli Beopdragte vun’n Kreis hett se dat „Plattdüütsch-Forum Hertogdom Launborg“ op den Weg bröcht, en Arbeidskring vun Beopdragte in Ämter un Städte vun’t Hertogdom Launborg, de sik dorför insetten doot, dat Plattdüütsch lebennig blifft. Mit Flyers warvt dat Forum för’t Plattdüütschsnacken, un dat sorgt dorför, dat dat jedeen Sünndag enen plattdüütschen Bidrag in de Launborgsche Utgaav vun de Lübecker Narichten to lesen gifft. En anner Aktschoon vun dat Forum is en Pries för Plattdüütsch in’n Kinnergoorn, den de Kreispräsident utgeven deit. - Mit den Börgerpries will de Launborgsche FDP wiesen un utteken, dat sik Börgers op besünner Oort ehrenamtli för de Gemeenschop in’t Launborgsche insetten doot.

"Plattdeutsch-Forum Kreis Herzogtum Lauenburg" / Beauftragte des Kreises Herzogtum Lauenburg zur Förderung der plattdeutschen Sprache, Helga Walsemann, Tel. 04542-2766

Link: Niederdeutsch im Kreis Herzogtum Lauenburg (Bestandsaufnahme des "Plattdüütsch-Forum Kreis Hertogdom Launborg")

http://www.herzogtum-lauenburg.de/media/custom/327_1817_1.DOC?La=1&object=med|327.1817.1 

Link: FDP Kreis Herzogtum Lauenburg http://www.fdp-rz.de/

(Plattnet-Nachrichten)