FreeCol-Computerspeel - ok op Plattdüütsch

Computerspelen op Platt gifft dat nich veel. Gorkeen geev dat betherto. Doch dat hett sik nu ännert. Nu kann dat Daddeln ok op Platt losgahn. Al in’n Januar is de Version 0.7.3 vun dat Speel FreeCol rutkamen. Dat Speel kann kumplett op Plattdüütsch instellt warrn!

FreeCol is anlehnt an dat Kultspeel Colonization vun’n Ooltmeester vun de Computerspelen, Sid Meyer. De Speler kummt 1492 mit sien Schipp in de Ne’e Welt an un geiht mit sien Lüüd an Land, en ne’e Kolonie to grünnen.

Nu geiht dat stüttig vöran. In Europa warrt Utwannerers anworven, mit de Indianers warrt Kontakt knüppt un ne’e Öörd warrt grünnt. De Kolonie wasst un bleiht op. Hannel mit Europa, mit de Indianers un mit de Kolonien vun de annern Europäers in Amerika warrt dreven. De Öörd wasst to grote Städer ran un in de Straten vun de Kolonien is en ne’en Snack to höörn: Unafhängigkeit! ’Keen kann dat toeerst schaffen, sik vun’n König in Europa los to seggen un de eerste Demokratie op’n amerikaanschen Kontinent to begrünnen?

FreeCol is Open Source un freegeven ünner de Lizenz GNU GPL, dat heet, dat Freewillige in jemehr fre'e Tiet dat Speel utklamüstert un jümmers beter maakt. Un dat köst nix. Elkeen kann sik FreeCol eenfach so vun de Websteed <http://FreeCol.org/> dalladen un dat in elkeen Spraak spelen - ok op Plattdüütsch.

(Marcus Buck)