Plattdüütsch Statut vun de Fehrs-Gill -

indragen bi’t Registergericht Lübeck

Dat Ämter un Gerichten Plattdüütsch as en Spraak un nich as enen Dialekt akzepteren mööt, kann man ut de Europääsche Charta för Regional- or Minnerheitenspraken sehn („Regionalspraak“). Dat se Dokumenten, de in de Regionalspraak Plattdüütsch un nich in de Amtsspraak „Düütsch“ (meent is „Hoochdüütsch“) schreven sünd, nich torüchwiesen köönt, steiht ok in de Sprakencharta. Na den Striet üm den Indrag vun de „Läägeünnerloage“ (Kohmatten) bi ’t Bunnspatentamt wullen de Maten vun de Fehrs-Gill en plattdüütsche Faten vun ehr Vereensstatut bi ’t Vereensregister anmellen. Dorüm hebbt se dat ole hoochdüütsche Statut ophaven, en plattdüütsche Faten annahmen. De Vörstand hett, as he dat nee Statut anmellen dee, ut Vörsicht en hoochdüütsche Översetten vun Prof. Dr. Hubertus Menke bileggt, so dat keeneen seggen kunn, he kann den Statutentext nich recht verstahn or man harr keen Garantie för en richtige Översetten.

So, as de Fehrs-Gill dat wull, is dat Statut denn bi dat tostännige Registergericht Lübeck in’t Vereensregister indragen worrn. Man kann nu in nalesen, wat in dat „Statut vun de Fehrs-Gill“ steiht: wat över „Naam un Sitt“ in den § 1, wat över den „Sinn“ un „Gemenen Nutten“ in § 2, över de Rechten un Plichten vun de „Maten“ in § 3, dat „dat Arbeitsjohr dat Kalennerjohr is“ in § 6 usw.

De Gill hett nu ok ehren Naam verdüütlicht. Se versteiht sik na ehren § 1 (1) as „Sellschop för nedderdüütsche Spraakpleeg, Literatur un Spraakpolitik i.V.“ Un na ehren § 2 is „de Sinn vun de Fehrs-Gill a) Material för ’t Spraaklehren antobeden un Seminoren to stütten, b) nedderdüütsche Literatur to verbreden, wobi se sünnerlich an dat Wark vun Johann Hinrich Fehrs to denken hett un c)  den kulturpolietschen Rahmen för de nedderdüütsche Spraak to verbetern“.

Marianne Ehlers un Heinrich Thies (www.fehrs-gilde.de)