Ollnborger Heimatbund De SPIEKER nimmt Afscheed van Hans Dirks

In dat gesegnete Oller van 95 Johr is SPIEKER-Ehrenbaas Hans Dirks an ´n 31. in ´n Märzmaand sturven. Een Läven för de Heimat gung to Enn.

Hans Dirks is 1912 in Nordenham up de Welt kamen, hett 1932 Abitur maakt, bit 1937 in Kiel studeert, un is Scholmester wurrn an verscheden Scholen Ollnborger Land. Denn keem de Krieg: den hett he van Anfang an mitmaken müsst. Van 1946 an weer he Scholmester in Babenstroh (Obenstrohe), un hett dar den Heimatvereen gründt un de „Georg-Ruseler-Gesellschaft“ up de Been stellt. 1950 hett de Heimatvereen Connefoor em updragen, den olen Bruuk van de Sünnwendfier, de siet 1920 Traditschon up ´n Heinenbarg weer, wedder in Gang to bringen. Bi den Heimatvereen Connefoor harr Hans Dirks 30 Johr lang dat Leit van de Volksdanskoppel un weer van 1973 bit 1984 Baas van den Vereen. 1954 gung he at Scholmester na Westerstäer, siet 1962 weer he Konrektor an de Hössenschol.

1954 hett Hans Dirks in den Ollnborger Heimatbund De SPIEKER den Mesterkring up de Been stellt un bit 1979 de Tögel inne Hannen hat. 1978 wurr he to ´n SPIEKER-Baas kürt un harr dat Leit van den Heimatbund bit 1989. Darna weer he de SPIEKER-Ehrenbaas.

Bi de Ollnborger Landschupp harr he dat Leit van de Arbeitsgemeenschupp „Volkstum und Brauchtum“. Dar hett he dat Book „Brauchtum im Oldenburger Land“ herutgäven.

För sien Doon un Wark för us Heimat hett he de SPIEKER-Ehrennadel in Sülwer, dat Verdienstkreuz am Bande des Niedersächsischen Verdienstordens un de Graf-Anton-Günther-Medaille kreegen.

De SPIEKER-Familje mit all ehr Krings un Heimatvereene dankt Hans Dirks för sien Wark för de Heimat, för nedderdüütsch Aart un plattdüütsch Woort.