http://www.filmemoker.de/

„Dat mokt wi gistern“

De Apparatspott is wedder ünnerwegens

(pn) Nu is he fardig - de drütte „Science-Fiction-Film up Platt“, den de Sulinger “Filmemoker”-Mackers produzeert hebbt. An’n 28. März is he dat eerste Mol in Diepholz wiest worrn. He schall nu würkli un wohrhafti de letzte Apparatspott-Film ween.

In „De lesste Apparatspott - Dat mokt wi gistern“ geiht dat üm en sünnerlich Tiet-Tunnel, in den en Börgermeistersche verschütt gahn is. Käpt’n Kork un sien Lüüd maakt sik op in ole Tieden, ehr to söken. Dorbi gifft dat allerhand schnaaksche Beleevnisse.

De beiden eersten Apparatspottfilme sünd bannig goot ankamen bi de Tokiekers in Norddüütschland. Bi mennig en Filmfestival sünd se as „Kult-Film“ lopen. Ok in düssen drütten Deel speelt wedder vele Amateure mit, man ok bekannte Schauspelers as Gerlind Rosenbusch, Armin Maiwald un Falko Weerts sünd dorbi. Mehr as twee Johr hett dat duert, den Film trecht to maken. He is friegeven för Tokiekers af 6 Johr. So hebbt ok junge Tokiekers ehren Spooß doran.

Man nu is woll Sluss mit de Geschichten üm den Apparatspott. De „Filmemoker“ hebbt niege Ideen. Ehr Verspreken: Dor schall wedder wat op Platt maakt warrn.

Allens över den niegen Apparatspott-Film is to finnen ünner:

http://www.apparatspott3.filmemoker.de/vcms/index.php

Dor sünd ok de Termine opföhrt, woneem un wann een dat Wark in Norddüütschland ankieken kann.

(PLATTNET-Narichten - Volker Holm)