Lebennig Krübbenspill in Nörden (Oostfreesland)

Nörden hett de grootste mit Bömen bestaande Marktplatz in Düütsland. 

Daar is an de Advent-Wekenennen all Jahr dat „Lebennig Krübbenspill“ to sehn.

De Nederdüütse Bühn Nörden spöölt de Wiehnachtsgeschicht.

De Bühnenbauers hebben de Stall van Bethlehem upbaut, groot genoog, dat de Krübb, umto Stroh un Hei, un Oss un Esel daar Bott in hebben.

Buten in de Kauen Schapen, all lebennig Deren.

En Spreker (Hans-Hermann Briese) leest dat Weihnachts-Evangelium na Lukas un Matthäus un de Daarstellers wiesen, wat geböhrde. Maria un Josef söken en Unnerdack. De Heerders verfehren sük. De Engel nimmt hör de Nood. En hele Koppel Engels is daar togang. Denn komen de Hillige Dree Königen hoog to Peerd. All bugen se hör Knejen vör dat Kindje in de Krübb.

Daarto spöölt en Posaunengrupp Wiehnachtsmusik un en Chor singt plattdüütse Leder to Advent un Wiehnacht.

Siet 2005 brengt de Bühn dat „Lebennig Krübbenspill“ und Dusende van Besökers van wied un sied kieken sük dat Spillwark an.

Upföhren: Saterdag, 06., Sönndag, 07., Saterdag, 13. un Sönndag 14. Dezember,

Klock 5 tegen Avend.

Dat Krübbenspill düürt 45 Menüten. De Intree is freei.