PLATTNET - CD-Tipp

Ursel Meyer liest ehre Hörspeele

„Dreihmusik“ un „De Mond passt op di op“

(pn) De Hörspeele vun Ursel Meyer ut Weyhe höört to dat Beste, wat dat op düt Rebeet geven deit. Ölben Stück sünd in de letzten Johren produzeert worrn. Un tweemol hett de Autorin al den „Hans-Henning-Holm-Pries“ kregen: 1988 för „De Mond passt op di op“ un 2005 för „Dreihmusik“.

Nu hett Ursel Meyer düsse beiden Stücken leest un op CD bröcht. Hörspeelen vun een Sprekersch lesen - geiht dat? Ja, dat geiht. De Schrieversch wiest dat in mennig en Lesung, de se afholen deit. Un ok de beiden CDs sünd Bewies dorför, dat de Autorin ehr Texten wunnerbor präsenteern kann. Man de Tohörer mutt sik bannig anstrengen, dat he allens mitkriegen deit bi düsse liesen, nadenkern Stücken. To’n Blangenbihöörn is dat nix.

In „Dreihmusik“ geiht dat üm den olen Karl Heitmann. He leeft alleen in en windscheefe Kaat merren in’t Feld. Bloots de Zivi Sascha höllt Kontakt to ehm. Un denn ward dat Windrad buut.

„De Mond passt op di op“ hannelt vun Marlene. Se is de Mudder vun Jens, de is dreeuntwintig un jümmers noch as en Kind. De Beiden wahnt mit ehr Oma in en Ferienhuus in Dänemark. Man denn gifft dat noch Thomas, he is en Fründ vun de Dree.

Ursel Meyer ehr Hörspeele vertellt vun vandaag. Woans kommt wi torecht mit al dat Niege in uns Tiet? Faken könnt wi’t knapp verstahn. De Stücken laat uns nadenken und mitföhlen, mennigmal aber ok smustern.

Negen vun de ölben Hörspele hett Ursel Meyer in ehr Book „Met de Tiet“, Hörspeele to’n Lesen, rutbröcht. De beiden vun de sünd ok dorbi. Dat Book ist rutkamen bi den WM-Verlag Weyhe un hett de ISBN-Nr. 978-9807444-8-5. (PLATTNET-Nachricht 8019)

Ursel Meyer list

Dreihmusik un De Mond passt op di op

Hörbuch, 2 CDs

WM-Verlag Weyhe

ISBN 978-3-9812556-0-7