www.plattpartu.de

Plattpartu in'n Maimaand

Moinmoin, leve plattdüütsche Frünnen!

Hüüt wüllt wi us glieks mit eernste Themen befaten, un dat eernsteste opstunns is ja "de Krise". Hier en Kommentaar in Schüddelriemels:

Liese kriggt de Krise

To wenig is’t, wat Liese kriggt.

– Wat dat wohl an de Krise liggt?

An Bonusgeld de Banker hangt,

man Liese vör den Henker bangt.

Wenn’t eerst üm Brood un Botter geiht,

denn hülpt nich mal mehr Kottarbeit.

De Banken kriegt ehr hoog Malöör

betahlt. – Dat will ik ok mal, höör!

Un bloots den Autobu to redden

un sik süss sacht to Ruh to betten,

dat treckt noch mehr de Krise lang.

Al de Gedank maakt Liese krank.

Ok dat de Staat sik Miese lehnt,

as weern dat nix as Kinnerspilln,

daför much se de Spinner killn.

– Dat is tominnst, wat Liese meent.

Düsse un anner Schüddelriemels to de eernsten Themen vun uns' Tied -- Alkoholismus, Piraterie, Swiensgripp un de Minschenwöörd -- finnt sik düssen Maand op www.numanto.de. Bavento sünd da niege Limericks un 3 niege Gedichten to finnen.

De Schüddelriemels weern vörsehn för de Lesen op dat nedderdüütsche Autorendrepen in Mölln, man da lang de Tied nich. Schüddelriemelfans weern benaut -- nu hebbt's dat hier. Ok dat Vertellsel "Se hett dat seggt", dat ik da leest heff, is nu bi www.vertelln.de natolesen.

Op Plattpartu weer de Maand wedder fast in de Hand vun de Maten op De Welt un Gott. Dat Erinnern-Flack höllt ganz ünnerscheedlich Bidrääg praat, vun den Dodesmarsch Cap Arcona, en Dokmenteern vun leegstes Unrecht, över de afsurde Boltenhäger Nixenposse bet na en echtes Buernhoff-Idyll. De Maimaand enn prächtig mit dat Pingstfest, dat wi mit niege Gedichten, Översetten un Andachten begaht.

Op dat Natuur-Flack sünd nich bloots de Maisebber, de Rapshonnig un de Swatte Imm los -- dormit harr een ja reken kunnt --, sünnern ok de Huushöhner. Dat Kruut is düssen Maand de Betonie.

Niege Klangdatein gifft dat ok: Anke Nissen hett dree Märken opleest:

• Dat Andersen-Märken vun'n Bookweten
• Dat Andersen-Märken vun't Fledermütterchen
• Dat Rosmarin-Märken vun Folke Tegethoff.

Dat de Datein afspeelt warrn köönt, brukt de Browser en lütt Tosattprogramm. Wenn Se de Datein nich afspeeln köönt, hebbt Se entweder dat Programm nich op'n PC, orr dat is ut Sekerheitsgrünn blockeert. Kiekt Se mal, wat de Browser baven in't Fenster en Henwies gifft!

Nu de Översicht. In'n Maimaand geev dat düsse niegen Bidrääg op Plattpartu.de:

Computerie:

Dütmaal hett dat nich klappt, pardon!

Plattdüütsch Künst:

An't Waoter bi Aobendlecht. Bild-Gedicht vun Ludgerd Lüske    (17.5.)

Notizen ut'n Saatmaand. Fotos un Verse    (3.5.)

De Welt un Gott:

Pingstmaondag. Ludgerd Lüske översett un bebillert Schenkendorfs Gedicht    (1.6.)

De Buernhoff in Tellingstedt. Kinnertiedsidyll vun Marita Pollak    (31.5.)

Gedichten to Pingsten. Niege Gedichten vun C.Denker un E.Eden un en Översetten vun "Du meine Seele, singe"       (31.5.)

Wunnerwarken in Mäkelborg: Dei Meerjungfru vun Boltenhagen. H.-J. Grebin tekent en Provinz-Farce na     (31.5.)

Vun'n Düwel. Eentlich vertellt Rudi Witzke hier vun't Kinneroptrecken!    (24.5.)

Mien Grillparty. Mallörvertellsel vun Helmut Marxen    (24.5.)

Zägenbodder, Zägenmelk -- igitt?! An Zägen gifft dat nix to Meckern, meent Günter Weber    (24.5.)

Ünnerwegens in Hamborg ...is Katja Renfert    (17.5.)

Pieles. En gresig Kinnertiederinnern vun Anke Nissen    (17.5.)

De graute Büxenwulf. Vertellsel vun Martin Hüttenbernd    (17.5.)

Hunnen mag ik leiwer. Erinnern vun Rudi Witzke    (10.5.)

Judengeschichten: Scholen in Rehna op't Meckelnborger Land. Vun Dieter Guderian    (10.5.)

Ovscheeden. Gedichten vun Ewald Eden    (10.5.)

Dodesmarsch Cap Arkona. En Erinnern vun Rudi Witzke to'n 64. Johrsdag vun en Katastrophe    (3.5.)

...un 11 Andachten vun Heinrich Giesen, dorünner dat kumplette Pingstfest.

Natuur un Wetenschap:

Dat Kruut för'n Braakmaand: Betonie. Vun Anke Nissen    (31.5.)

En Besöök bi de Huushöhner maakt Antje Heßler un knipst dorbi ok swatte un tigerte Küken    (24.5.)

Rapshonnig un de Swatte Imm, vörstellt vun Anke Nissen un Rudi Witzke    (17.5.)

Maisebber. Antje Heßler nimmt se gründlich ünner de Luup!     (10.5.)

...un in't Natuurnotizbook:

Distelfalter in't Unweder -- se hebbt överleevt in Antje Heßler ehrn Goorn    (31.5.)

En blagen Bottervagel ...un den Boom dorto wiest Antje Heßler    (24.5.)

Mairegen! Schönheit pur, knipst vun Antje Heßler    (22.5.)

De Ies-Hilligen stellt Anke Nissen mal persönlich vör     (15.5.)

Wat in de Welt vörgeiht:

Mudders Dag. En Geschenkvörslag vun K.-H. Nissen    (10.5.)

Klinsmann Ade!, seggt Günter Weber    (3.5.)

...un 2 niege Kortkommentaarn in't Plattdüütsche Notizbook vun Marlou.

Hartlich grööt

Marlou Lessing und dat lütte Plattpartu-Team:  www.plattpartu.de