„Schölers leest Platt“ - Vörleeswettbewarb in Sleswig-Holsteen

(pn) In de Scholen in Sleswig-Holsteen ward in düsse Daag düchtig Plattdüütsch snackt. De Vörleeswettbewarb is nu richtig in Gang kamen. Lütte un grote Kinner sünd dorbi, ut een vun de Leesheften, de de Heimatbund verdeelt hett, sik en Geschicht uttosöken, de se besünners goot vördregen könnt. Schoolmestersche un Schollmesters hölpt ehr dorbi, ok wenn de sik sülvst mennigmal swor doot mit Snacken un Lesen. Man dor sünd oftins Öllern un Grootöllern, de hölpen doot. Mennigmal kommt Lüüd vun plattdüütsche Vereene un enkelte Plattsnacker in de Scholen un wiest de Kinner, woans dat plattdüütsche Lesen richtig geiht.

Bit Wiehnachten mööt de Scholen ehr Schoolsiegers fastleggt hebben. In’t niege Johr geiht dann denn wieder mit den Wettbewarb in de Naverschop, dor sorgt denn ok vele Bökerien in’t Land för en schöne Veranstalten. In’n Maimaand staht denn ok de Regionalsiegers fast. An’n 16. Juni schüllt de in Rendsborg wiesen, keen de beste Vörleser in’t Land is.

Utschreben is ok de Wettbewarb „Do mal wat op Platt“ för besünner Plattdüütschprojekten an de Scholen. Bi de Veranstalten in Rendsborg warrn de besten vörstellt.

„Schölers leest Platt“ un „Do mal wat op Platt“ ward organiseert vun den Sleswig-Holsteenschen Heimatbund. Hölp kriggt he dorbi vun de Sporkassen un de Sporkassenstiften, de düchtig Geld tostüert. Mit dorbi sünd ok de Bökerien in’t Land, de Plattdüütschzentren un mennig anner, de dorbi sünd. Dat Ministerium för Bilden hölt de Hand doröber un hett de Scholen opropen, mittomaken.

Keen mehr weten will: http://heimatbund.de/niederdeutsch/vorlesewettbewerb.php  

(PLATTNET-Nachricht)