PLATTNET  -  CD-Tipp

„Ünner't Strohdack lll"

40 Johr Plattdüütsche NDR Lesungen in’t Sleswig-Holsteenische Frielichtmuseum

Op de nee CD „Ünner't Strohdack III“ sünd de bekanntesten plattdüütschen Verteller un NDR Radiospreker mit ehre Geschichten to hören. Wenn Ina Müller op „Pilotin Nicole" dröppt un Gerd Spiekermann „Eine Nacht voller Seligkeit" beleevt, kann een sik dat Lachen nich verkniepen. Uwe Friedrichsen leest „Günti maakt 'n Lungentoch" un de Ohnsorg Theoter Schauspeler Jochen Schenk gifft mit „De Konfirmand vun de Waterkant" en Stück vun Hermann Claudius to 'n Besten. Wat to 'n Nadenken beed Irmgard Harder, ehr Verteilen „Heemlikeiten" speelt in 2. Weltkrieg.

De teihn Bidrääg vun de CD stammt ut dat Tonarchiv vun de NDR Veranstaltungsreeg „Ünner't Strohdack". AI siet över 40 Johren richt de NDR in'n Drathenhoff in dat Sleswig-Holsteenische Frielichtmuseum in Molfsee plattdüütsche Leseavende ut. En ganzen Barg Lüüd kaamt dor elkmal tohoop. Se erleevt bi Smoltbroot un Punsch en Avend „Ünner't Strohdack" mit Leder un Geschichten op Platt.

As de NDR 1969 to 'n eersten Mal op den Drathenhoff inlaadt harr, güng dat Thomas Victor Adolph, he weer domals de Baas vun’n NDR, ok dorüm, dat Frielichtmuseum in’n Winter mit Lüüd to beleven. Dorut is en vun de schönsten plattdüütschen Veranstaltungsregen worrn. De Tokiekers hebbt hier in’n Loop vun de Tiet vele grote plattdüütsche Verteller un Muskanten to sehn un to hören kregen, so as Hermann Claudius, Rudolf Kinau un Ivo Braak. Opstunns sünd Gerd Spiekermann, Manfred Brümmer un Ines Barber op 'n Drathenhoff mit vun de Partie.

To de Fier vun 40 Johrn „Ünner't Strohdack" hett de Wachholtz-Verlag tohoop mit 'n NDR nu de drütte CD mit Opnahmen vun de plattdüütschen Leseavende rutbröcht. To finnen sünd dorop Stücke ut de eersten Johren un ut de hüütige Tiet - vun Irmgard Harder bit Ina Müller. 65 Minuten Platt vun't Beste!

NDR l Welle Nord (Hrsg.), Christoph Ahlers (Redaktion)

Ünner't Strohdack lll

Plattdeutsche Lesungen im Schleswig-Holsteinischen Freilichtmuseum - 40 Jahre Jubiläums-CD 

Wachholtz Verlag Neumünster 

ISBN: 978 3 529 04780 0

16,00 Euro