Internet-Tipp:  www.plattcast.de        

De „Fofftig Penns“ bi den europäischen Lederwettbewarb „Liet International 2009“

(pn) Al in'n Oktober hett de europäische Lederwettbewarb för Regional- un Minnerheitenspraken stattfunnen in Leeuwarden in’t nedderlannsche Freesland. Twölf Ledergrupen ut ganz Europa sünd dorbi ween; all hebbt se sik in een vun de 50 lütten Spraken, de vun de Sprakencharta schützt sünd, präsenteert.

För de Plattdüütschen weer de nedderdüütsche Hip-Hop-Band „Fofftig Penns“ ut Bremen dorbi. Mit ehren Titel „Platt“ sünd se op den 8. Platz kamen.

Dat Internetportal „Plattcast“ hett nu op sein Siet (www.plattcast.de) en grootordigen Bericht över de Veranstalten as Video stahn (10min.) Dor verklaart Onno Falkena vun’t Organisatschoonskommitee, wat dat mit den Wettbewarb op sik hett, dat dor bloots Vertreder vun de lütten Spraken mitmaken dörft, dat de Europaraat sein Hand doröver hölt un vörweg en Konferenz to Themen vun de Europäische Charta för Regional- un Minnerheitenspraken afholen hett un dat üm un bi 800 Lüüd in’t Theoter in Leeuwarden kamen weern, ok wenn se de Texten nich verstahn kunnen, de ober heel begeistert tokeken un tolustert hebbt. Un de Jungs vun „Fofftig Penns“ bericht vun ehr Indrücke bi dütt groot Veranstalten, ofschoonst se „bloots“ den 8. Platz maakt hebbt. Sieger is en Grupp ut Finnland worrn, de smuck utsehn, man ok gode Musik maakt hett.

Ankieken lohnt sik!  Bi „Plattcast“ findt sik ok en Link na Youtube, wo en Video mit den Optritt vun de „Fofftig Penns“ in Leeuwarden instellt is.

Ok bi PLATTCAST stellt Cornelia Nath vun't Plattdütskbüro in Auerk (Ostfriesische Landschaft) de EBLUL-Konferenz „Partnerhip for Diversity“ in Leeuwarden för. Ok dütt Interview schull een sik ankieken!

De Siet vun den Wettbewarb is: http://www.liet.nl/

(PLATTNET-Nachricht)