Wilhelmine-Siefkes Pries 2010 an Theo Schuster

All veer Jahr schrifft de Stadt Leer de Wilhelmine-Siefkes-Pries ut. Siet 1990, un dat geböhrde nu för 't sessde Maal.

Wo moi, dat na 20 Jahren een ut Leer de Pries kegen hett. Wo moi, dat een de Pries kregen hett, de Wilhelmine noch sülvst kennt hett. Wo moi, dat Theo Schuster hör Boken rutbrocht hett un rutbrengen deit!

Good, 'n bietje unklook is een, de alltied weer plattdüütse Boken in de Welt brengt. Dat hett al Moritz Jahn schreven in sien Gedicht „DE ARTE POETICA GERMANIAE INFERIORIS“ (Von der niederdeutschen Dichtkunst):

Laat di raden: Troo kien Minsk mehr,

Holl dien Hand in Task, koop nix mehr –

Jobenaamd*) kien plattdüütsk Book!

(* jobenaamd = besünners ok)

Dat „Ostfriesisch-plattdeutsche Dichterbuch“, Enno Hektor sien „Harm Düllwurtel“ un sien Gedichten, Wilhelmine Siefkes hör „Keerlke“ un hör Märken un hör Vertellsels, Theodor Dirks sien „Tod auf Langeoog“, Hermann Boerma sien „Müller von Riepe“, „Die Überfahrt zur Weißen Insel“, Albrecht Janssen sien „Grote Jan un lüttje Jan“, de „Eerdmanntjes“, „Dat Ollske un de Bigge“, tolesd „Jan Manntje in 't papieren Huuske“, upschreven van Wilhelmine Siefkes, all dat hett he weer neei rutgeven.

Un de Gedichten van Wilhelmine, Greta Schoon un Siegfried Kessemeier, hett he rutbrocht, as Book un ok up Platen (as dat noch gaar kien „Hörboken“ gaff). Woordenboken Hochdeutsch / Plattdeutsch un Plattdüütsk / Hoogdüütsk hett he in sien Programm, daar warkt he ok tosamen mit de Oostfreeske Landskupp un dat „Institut für niederdeutsche Sprache“. Un noch vööl mehr...

En heel besünner  Book van Theo Schuster is „Bösselkatrien heet mien Swien – Das Tier in der ostfriesischen Kulturgeschichte und Sprache“ – wat 'n Lüst to lesen!

(Carl-Heinz Dirks, DIESEL)