PLATTNET  CD-Tipp

WunnerWark „van hier“

(pn) En „Speegelplatte“ von Martin Engbers un Gerold Fuhler ut Friesoythe un ümto mit plattdüütsche Leder, de mehrsten schreben vun Martin Engbers; man ok traditionelle Titels sünd dorbi.

De beiden Musikers hebbt al as Kinners tohopen in de Sandkist seten un op Ammers inkloppt. Man intwüschen sünd se wat wassen un hebbt sik utbillen laten. Liekers blifft ehre Spraak dat Platt ut Neischarrel. Gerold Fuhler örgelt un leevt as Musikmester. Martin Engbers warkt mehr mit Wöör, man lehrt ok Kinner un Grote in Musik.

Sößteihn Titels sünd op de CD to höörn, eher wat besinnlich un to’n Toluustern. De Texten sünd de Ledermakers wichtiger as Melodien, de de Tohörers inlullen kunnen. So bringt se ehr Botschaften röver as „Waohr Di, dat Du den Dag verkleist“. Man ok för Smustergrienen is sorgt as bi „Ick hebb een in’ Tee“. Mennig Instrumenten hebbt de beiden insett: Klavier, Flügel, Örgel, Akkordeon, Saxophon, Fleite un Bass (Gerold Fuhler), Kling-Klong- un Schütteleie, Kazuo, Klarinette, Dudelsack, Snutenhobel un Gitarre (Martin Engbers). Jümmers vörnweg de Gesang vun Martin Engbers mit en klore Stimm, so dat een den Text goot verstahn kann.

Mag ween, för den een un annern sünd vele vun düsse Leder en beten to melangklöterig. Man för Lüüd, de Möög hebbt, Plattdüütsch to verstahn, is dat seker en Hölp, wenn se de Texten eher wat suutje folgen könnt. Mag ween, de Spegelschiev lett sik dorüm ok för’t Plattdüütschleern bruken.

WunnerWark

„van hier“

Musik-CD

Miendien Vermaok Frieseithe

www.wunnerwark.de

Köpen ok bi www.plattschapp.de

(PLATTNET-Nachrichten)