15. Düütsch-Amerikaansche Plattdüütschkonferenz

11.-13. Juni 2010 in D-24589 Nortorf/Nordörp - Oproop to’n Mitmaken

Düütsch-Amerikaansche Plattdüütschkonferenz – Wat is dat?

Eenmal in’t Johr draapt sik Plattdüütschfrünnen ut Noorddüütschland mit Frünnen ut de Mittlere Westen vun de USA. Disse Drapens sind immer umenanner mal in de Mittlere Westen vun Amerika un mal in Schleswig-Holsteen. Op de Konferenzen kaamt Lüüd tosamen, de ehr Wurteln in Noorddüütschland hebbt un de sik bi Plattdüütsch tohuus föhlt.

Dat gifft immer noch Amerikaners, de in ehr Kinnertiet meist blots Plattdüütsch snackt hebbt. Dat kummt dorvun, dat de Vörfohren sik as Inwannerers in dat fremde Land Amerika meist mit Verwandten un Frünnen ut de ole Heimat tosamen ansiedelt hebbt. So kunnen se in de Niee Welt goot mit ehr plattdüütsche Moderspraak torechtkamen. 

Op de Söök na ehr Wurteln in Noorddüütschland hebbt de Plattdüütschen ut de Mittlere Westen vun de USA siet vele Johren Kontakt söcht to de Heimat vun ehr Vörfahren. 1989 hebbt se de American Schleswig-Holstein Heritage Society (ASHHS) grünnt. Över disse Organisation sind vele private Verbinnungs un de Plattdüütschkonferenzen in’e Gang kamen. 

Bit nu hebbt vun düütsche Siet meist blots Lüüd ut Schleswig-Holsteen an de Konferenzen deelnahmen. Doch nu muchen wi uns geern uk mit Lüüd ut anner Bundeslänner verbinnen.

Wi freut uns op jeden Besöker, enerlei ob ooltbekannt oder to’n eersten Mal dorbi, ob aktiv dormank oder as Minsch, de eenfach mal kieken will. Jedeen warrt to sien Recht kamen.

Wat to Weten nödig is, steiht in de PDF-Anlaag: Anmellen, Programm, Anfohrt, Kontakt usw.

Kontakteern för Fragen: Annemarie Jensen, Tel. 0461-3184707, E-Mail: a.jensen@stage-combat.de

(Amt Nortorfer Land, American Schleswig-Holstein Heritage Society ASHHS, Nordörper Volksgill, Dr. Annemarie Jensen)