He heet Arne Pöhlsen un is Naver un en goden Fründ vun de PLATTNET-Redaktion. Platt schnacken kann he ok en beten - verstahn allerbest. Sienen Passat mit dat grote „P“ in’t Autokennteken, den hett he al en poor Johr.

Man de Geschicht mit dat Reserveern vun dat „P“ för Plattschnackers bi de Tolatenstell, de hebbt wi uns utdacht - an’n 1. April.

In’t Blatt heff ik leest, dat „In’n-April-Schicken“ kümmt ut de Mood. Wi kennt noch de Klassikers: Lehrlinge worrn to’n Inköpen schickt, schulln „Gewichte för de Waterwaag“ holen oder „Alumagneten“. Mag ween, de Lüüd sünd bang, dat ehre Witzen nich ankommen doot, dat se sik blameeren, wieldat keeneen dat lustig finden deit. Mag ween, ehr fallt sülben nix mehr in. Lustigen Spijöök, den hebbt wi jedeen Dag in’t Fernsehen un in’t Radio. Dat is nu Saak vun de Profi-Comedians, de alltiets op alle Kanäle togangen sünd - een lustiger un luder as de anner. Mag ween, ok hüüt - an’n Stillfreedag ...

(PLATTNET - Volker Holm)