29.08.2010 - (10088) Hayo Schütte - tachentig Johr!
 
              PLATTNET-Nachrichten - 29.08.2010 

 

    

 

Hayo Schütte - tachentig Johr!

He hett al in en Vagelnest seten!

 

(pn) To Welt kamen is he in Oostfreesland, man denn hett em de Tiet dörch de Welt spöölt, na Holsteen un na anner Steden op de Noordhalvkugel. Nu sitt he, de ehemalig Schoolmester, in sien Huus achtern Elvdiek in’t Wendland un vertellt vun siene Beleevnissen un vun dat, wat em dörch den Kopp geiht. Un dat is allerhand snaakschen Kraam: Alldagssaken un Gedanken vun Gott un de Welt. Man wenn du meenst, dat maakt doch vele Rentners, de ehr Erinnern op Papier bringen doot, denn kennst du Hayo Schütte nich. De Aart un Wies, woans he dat bedrieven deit, de is allerbest.

Mit sien Book „As ik noch wat jünger weer...“ hett he al wiest, wat he kann: modern Vertellen op Platt, ut egen Beleven, man mit eernsthaftig Vergnögen för uns all. Un mit dat Kinnerbook „Dree Kinner un een Peerd“ vertellt he Beleevnisse mit sien Enkelkinner, op en Aart, de Spaaß maakt, dat Book op’n Stutz toenn to lesen.

Nu - rechtiedig to sien Tachtigsten - is dat niege Book fardig: „Hest du al mal in en Vagelnest seten?“ Klor doch, dat Hayo dat beleevt hett, in’t Storkennest op sien Huus. Un dorbi is de Ledder ümfullen ...

Fründ Erni is een vun sien Figuren, de em hölpen doot, dat düsse un anner Vertellen en besünner Lebendigkeit kriegt. Klamauk un Tüünkraam is dat nich, wat de Texten utmaken doot, dat is fiensinnig Humor. Un en groot Portschoon Levensphilosophie is mit dorbi. Mi hett dat erinnert an de achtersinnigen Vertellsels vun FH Schaefer üm den sien Kunstfigur Fiete Knust.

DIESEL schrifft in sien niege Utgaav 73: „De Texten sünd vull van Phantasie un ’t is ’n Pläseer to lesen.“ In DIESEL hebbt se ok de wunnerbor Geschicht „Höhner-Urlaub“ afdruckt. De steiht twars nich in dat niege Book, man se is en allerbest Bispill för de Vertellkunst vun den Schrieversmann Hayo Schütte.

To de plattdüütschen Geschichten gifft dat jümmers op de linke Siet en hochdüütsche Version dorto. Wat dat nödig deit?

En besünner Togaav to dat Book sünd twee Spegelschieven, op de Hayo Schütte vele vun sien Geschichten lesen deit - en fein Hörbook, mit de dat Lesen vun de Texten bannig veel Spaaß maakt.

En Bontsche dorbi sünd de Leder mit Dochter Rika, för de ehr Grupp „Swing op de Deel“ Vadder Hayo de plattdüütschen Texten schrieven deit.

Rika Tjakea Schütte is dat ok, de en grote Geburtsdagsfier in Gang sett hett: En groten plattdüütschen Abend mit Geschichten vun Hayo Schütte un Musik vun „Swing op de Deel“. Hartli Graleern!

 

Hayo Schütte

Hest du al mal in en Vagelnest seten?

Book un Spegelschiev

Hg. v. Hayo Schütte und Rika Tjakea Schütte

Selbstverlag

Cacheriener Str. 17

2010 Langendorf/Elbe

ISBN 978-3-00-031212-0

 

(PLATTNET-Nachrichten)

____________________________________________________________________________________________________________________________________________________________________

 

PLATTNET.de   Nachrichten

Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de  ist ein Dienst des Zentrums für Niederdeutsch in Holstein (www.niederdeutsch-zentrum.de)  

PLATTNET.de  Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de