De Sparkassenstiften vun Neddersassen löövt den „Lüttjepütt-Pries“ 2011 ut

Projekten för Kinner un junge Lüüd or vun Kinner un junge Lüüd schöllt uttekent warrn.

Willem Busch hett mal öber sik sülvst seggt: ‚Ik bün stolt, wat ik twee Spraken spreken kann: Plattdüütsch un Hoochdüütsch!’ De plattdüütsche Spraak is je keen Dialekt, se steiht op egen Been un is bet vundaag een lebennig Deel vun Spraakkultur in Neddersassen.

Wat dat ok so blieben deit – dor sett sik de Sparkassenstiften vun Neddersassen jüst so as de Sparkassen in’t Land al Jahren lang för in. Se organiseert to’n Bispeel den Wettbewerb ‚Schölers leest Platt’, de dor op tostüern deit, wat de Kinner al in de School wat mit Platt opstellt. Ok de Lüttjepütt-Pries is een Teken, wo wichdig de Stiften dit Thema nehmen deit.

De Sparkassenstiften vun Neddersassen gifft ok anner Priesen ut, wo sik enkelte Lüüd dör ehr Schrieben un Don as Meister utwiest hebbt. To’n Bispeel gifft dat den Hans-Henning-Holm-Pries för dat nedderdüütsche Hörspeel un den Quickborn-Pries för plattdüütsche Literatur un Forschen in de Volkskunn.

De Lüttejepütt-Pries, den sien Nomen vun Johann D. Bellmann sien Book nohmen is, schall alle veer Johren utlöövt warrn un 3.000 Euro weert wesen. Allens, wat op Platt för Kinner un junge Lüüd produzeert un vörwiest warrn kann, man ok, wat vun Kinner un junge Lüüd stammt, kann den Pries tosproken kriegen. So köönt de Lütten un de Groten Priesdräger warrn. Een kann sik as enkelte Minsch, as Grupp un ok as Vereen bewarben.

Een Priesgericht, wo een ut den Vörstand vun de Bevensen-Dagfahrt, een vun dat Institut för Nedderdüütsche Spraak, een vun’n NDR un een vun de Sparkassenstiften un noch fiev anner Lüüd mit Verstand un Weten üm Plattdüütsch mit tohören schöllt, ward den Priesdräger/de Priesdrägerin utkieken.

De Pries ward bi de Bevensen-Dagfahrt in’n September 2011 utgeben. Bewarben kann een sik bet to’n 31. März 2011 bi de ‚Niedersächsische Sparkassenstiftung’, Schiffgraben 6-8, 30159 Hannover. Un een kann bi den Pries nich vör Gericht trecken!

(Übertragung ins Niederdeutsche: Dirk Römmer)

(Niedersächsische Sparkassenstiftung)