Plattdüütsch för Kinner

Themensiet in de Kieler Narichten

Een ganze Siet mit Bispillen vun niege Böker un CDs för Kinner geev dat letzt Friedag in de Rubrik „Ünnerholung op Platt“ vun de „Kieler Nachrichten“. De hett Heike Thode-Scheel tohopen stellt. Mit „Plattdüütsch as Geheemspraak“ wiest se op en Hörspill-CD vun Christa Warncke hen, op de de Deerten op’n Hoff „Hinnerk“ Plattdüütsch as Geheem- un Töverspraak bruken doot. Un för de ganz Lütten is „Lüttjet Platt“ rutkamen - en Erst-Platt-Billerbook vun Valeska Scholz. - Ganz frisch in’n Bookhannel sünd ok de „Quickborn-Kids“-Böker, een niege Reeg op Platt för Kinner, Schoolen un Kinnergoorns vun’n Quickborn-Verlag mit twee eerste Heften vun Christianne Nölting.

Keen mehr weten will: De Bidrääg sünd op de Platt-Siet vun KN-Online to finnen. Dor gifft dat ok en lütt Video över de „Hinnerks“ un ehr Geheemspraak Plattdüütsch. http://www.kn-online.de/platt

(PLATTNET-Nachrichten)