Plattdüütsche Kulturdaag in Eckernföör

7. bis 13. November 2010

Dat negente Mal veranstalt de Stadt Eckernföör un de Plattdüütsch Gill Eckernföör ehr „Plattdüütschen Kulturdaag“. Dat gifft wedder en bunt Programm för lütte un grote Lüüd.

Sünnerlich an lütte Kinner un Schölers hebbt de Veranstalters dacht:

Marianne Ehlers un Renate Poggensee wiest Mitarbeiters in Kinnergoorns un Grundscholen, woans se mit de Kinner plattdüütsch schnacken könnt. Karin Strohbeen-Hansen speelt mit lüttere Schölers plattdüütsch Memory un Karl-Heinz Groth wiest de Grötteren plattdüütsch Spraak un Literatur.

Man ok för utwussen Lüüd is mennig wat dorbi: En plattdüütschen Gottesdeenst, Lesungen mit Petra Wede, Heiner Egge un Karl-Heinz Groth, en plattdüütschen Theoterabend un en Konzert mit Lars-Luis Linek, Fontaine Burnett un de Grupp „tass-tee“. An’t Enn steiht en Schrievwarksteed vun den SHHB mit Kay Kankowski.

Dat vollstännige Programm is natolesen in den Folder, de düsse Naricht anhängt is.

(PLATTNET-Nachricht)