28.11.2010 - (10147) Plattdüütscher Abend bi't Zentrum för Nedderdüütsch in Ratzeborg
 
              PLATTNET-Nachrichten - 28.11.2010 

 

 

           

 

 

„Plattdüütsch in de Vörwiehnachtstiet“

Plattdüütscher Abend bi’t Zentrum für Nedderdüütsch in Ratzeborg

 

(pn) Dat is nu al gode un lange Traditschoon, dat de Landdagspräsident vun Sleswig-Holsteen as Vörsitter vun den Biraat Nedderdüütsch un de Nedderdüütschzentren inladen doot to en plattdüütschen Abend in de Vörwiehnachtstiet, jümmers bi een vun de beiden Zentren. Veerteihnmal hett dat nu al stattfunnen un siet 1998 hett dat Plattdüütschzentrum in Ratzeborg sövenmal dat Drepen utricht. So weern över hunnert Gäst an verlegen Dünnersdag in’t Huus Meckelborg kamen. Dat worr bannig eng in den Reutersaal, wo de Leiter vun’t Zentrum Volker Holm de Besökers begröten dä.

„Nix för Bangbüxen“ weer dat Motto vun Ines Barber, de ehr Geschichten vördregen dä. De NDR-Moderatorin un Autorin vertell frisch un munter, mal nadenkern, man meist humorig un mit Smustergrienen. Un dat Publikum hett dat bannig goot gefullen.

Stimmungsvoll Musik maken Jörg-Rüdiger Geschke un sien Söhn Jonas ut Mölln. Leder as „Över de stillen Straten“ un „Wiehnachten is nich wiet“ passen so recht in den adventlich schmückten Saal.

As vele Politikers is de Präsident vun den Sleswig-Holsteenschen Landdag Torsten Geerdts keen „Plattschnacker“. In sien hochdüütsche Begröten sä he, dat he sik as Vörsitter vun den Biraat Nedderdüütsch liekers för de Spraak un för den Landesplan Nedderdüütsch insetten dä. Dorför, dat Plattdüütsch en Tokunft hett, mutt noch veel doon warrn, sünnerlich in Kinnergoorns un Scholen. Dorbi hölpt düchtig de beiden Nedderdüütschzentren in Leck un Ratzeborg. Mit de AG Bildung vun’n Nedderdüütschbiraat schall dat in’t nächste Fröhjahr in’t Landeshuus in Kiel en besünner Veranstalten för „Plattdüütsch in’n Kinnergoorn“ geben. Ok dat Siegel „Plattdüütsche School“ schall wedder utlaavt warrn.

Ok Politikers ut den Kreis Hertogdom Lauenborg un de Stadt Ratzeborg weern bi den plattdüütschen Abend dorbi, ok de Kreispräsident Meinhard Füllner, de Börgermester Rainer Voß un de Börgervörsteher Ottfried Feußner. He bedank sik, dat dat Nedderdüütschzentrum in’t Huus Meckelborg siet vele Jahren en wichtig Kulturbidrag för de Stadt leisten deit.

Achteran weer Gelegenheit to’n Klönschnack bi Eten un Drinken, mit den de Abend utklingen dä.

En utföhrlich Bericht mit vele Billers vun Brigitte Gerkens-Harmann findt sik bi dat Kulturportal för den Kreis Hertogdom Lauenborg: www.rzkultur.de

(PLATTNET-Nachrichten)

_____________________________________________________________________________________________________________________________________________________________________________________________________________

 

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de  ist ein Dienst des Zentrums für Niederdeutsch in Holstein (www.niederdeutsch-zentrum.de)  

PLATTNET.de  Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de