Niegen Partner för „Vertell doch mal!“:

Radio Bremen stiggt mit in bi’n plattdüütschen Vertellwettbewerb vun’n NDR

"De Norddüütsche Rundfunk hett Radio Bremen as niegen Partner för den plattdüütschen Schrievwettbewerb „Vertell doch mal!“ wunnen. Mit de NDR 1 Welle Nord, NDR 1 Neddersassen, NDR 1 Radio MV, NDR 90,3 un tokünftig ook Radio Bremen engageert sik denn Programmen ut all norddüütsche Länner bi’n gröttsten plattdüütschen Wettbewerb in’n Norden.

Ernst Christ, Baas vun de Zentralredaktschion Nedderdüütsch bi’n NDR un in’t Lannsfunkhuus Sleswig-Holsteen as Redakteur tostännig för „Vertell doch mal!“, freut sik över den niegen Partner Radio Bremen: „Düsse norddüütsche Tosamenarbeit is good för dat Plattdüütsche un een goodet Teeken för de Minschen in’n Norden, de düsse Spraak snackt, schrifft un leevt. Dorto kümmt, dat düsse niege Kooperatschion de enge Tosamenarbeit twüschen NDR un Radio Bremen noch stärker maakt. För düssen Wettbewerb sünd wi nu gespannt op plattdüütsche Vertellen ook ut Bremen.“

2011 söcht de NDR Lannsprogrammen mit den Schrievwettbewerb „Vertell doch mal!“ all to’n 24. Mal de besten plattdüütschen Geschichten - denn to’n ersten Mal tohoop mit Radio Bremen. Siet 1988 hebbt Dusende Schrieverslüüd wiet mehr as 40000 plattdüütsche Vertellen inschickt. Bi dat Priesverdeelen in’n Mai warrn elkeen Johr de fief besten Vertellen in’t Ohnsorg-Teater in Hamborch vun Ohnsorg-Schauspeelern präsenteert. De Wettbewerb geiht wöller los an’n 19. Januar 2011." 

(Presseinformation des NDR am 27.12.2010 - www.ndr.de)  

Foto: NDR