“Alice’s Adventures in Wonderland” - nu ook up Platt!

De ingelsche Klassiker Alice’s Adventures in Wonderland vun 1865 (schreven vun Lewis Carroll) ward tomehrst as ’n Kinnerbook ankeken. Liekers ward he vun tominnst so veel upwussene Lüd’ geern leest, un mennig een seggt, dat he dat Book in sien öllern Jahrn beter versteiht un lever hett as in sien Kinnerjahrn. Ja, up de hele Welt gifft dat ’n Barg Carroll-Vereenen, un för de is düt Book de Brennpunkt. Dat is bitherto in so üm un bi 100 Spraken överdragen worrn, in de „wichtigern“ mank jüm mehr as eenmaal.

Nu is ’t jüstemang ook up Plattdüütsch ruutkamen! För Reinhard F. Hahn is düt Överdregen bitherto sien pièce de résistance. „Mit dat Översetten bün ik lichtfardig trecht kamen,“ seggt he, „man dat kulturelle un litteraarsche Lokaliseern was ’n heel annere Saak, un de kannst nich so lichtfardig berieten.“ Düt is ’n Droomvertelln vun ’n lütte Deern in’t viktoriaansche Ingland. Dat is vull vun Fantasiekreatuurn, snaakschen Klöönsnack, gediegene Woordspeeln un verdreihte Riemels. Woordspeeln kannst nich vun een Spraak in ’n annere översetten; nee, de mutt ’n nee schrieven. Liek so mit de bekannten ingelschen Gedichten, de bi Alice verdreiht ruutkaamt. Daar hett Hahn „lokaliseert“ Riemels vun Klaus Groth för nahmen.

Alice ehr Eventüürn in’t Wunnerland

vun Lewis Carroll, mit Biller vun John Tenniel,

plattdüütsch överdragen vun Reinhard F. Hahn,

Westport (Irland): Evertype, 2010

ISBN 978-1-904808-62-6, 12.95 Euro

In’t Internet kannst dat Book un ook de ingelsche, hoogdüütsche un annere Uutgaven hier bestelln:

http://lowlands-l.net/gallery/hahn_alice.php

(Reinhard F. Hahn)