Heinz-Werner Arens is storven

(pn) In de Nacht vun Dingsdag op Middeweken is Heinz-Werner Arens, de fröhere Präsident vun den Sleswig-Holsteenschen Landdag, na schwore Krankheit storven.

26 Johr is Arens för de SPD in’n Kieler Landdag ween, dorvör hett he as Sonderschoolpädagog dat Leit hat vun de Sonderschool in Heid’ (Stadt Heide). As Vörsitter vun den „Schuuvladen-Utschuss“ weer he besünners engagiert, Fragen üm de Roll vun SPD-Politikers in de „Barschel-Affäre“ optokloren. As Landdagspräsident (1996-2005) hett he düchtig wat in Gang sett för den betern Kontakt vun uns Bundesland mit de verscheden Ostseestaaten, un as Vörsitter vun de Förderalismuskommischon hett he de Debatte üm en Reform vun dat System vun Bund un Länner mit op den Weg bröcht. 

He weer ok negen Johr lang Vörsitter vun den Nedderdüütsch-Biraat bi’n Landdag. De Dithmarscher Arens hett hett sien Moderspraak Plattdüütsch schnackt, wo’t jichtens güng, un dorför, dat de lütten Spraken in’t Land ehr Hölp kriegen schulln, hett he sik jümmers insett. „Er war als Mensch und als Abgeordneter seiner Heimat sehr verbunden und hat sich in ganz besonderer Weise für die Minderheiten und den Erhalt der niederdeutschen Sprache eingesetzt“, schrifft de Präsident vun den Sleswig-Holsteenschen Landdag, Torsten Geerdts.

De letzten Johren is Heinz-Werner Arens ehrenamtlich aktiv ween: as Landesvörsitter vun WEISSER RING, as Vörsitter vun dat Kuratorium Schleswig-Holstein-Tag un as Vörsitter vun de Klaus-Groth-Sellschop.

Heinz-Werner Arens is 71 Johr oolt worrn.

www.landtag/ltsh.de

http://de.wikipedia.org/wiki/Heinz-Werner_Arens

Foto: Schleswig-Holsteinischer Landtag

(PLATTNET-Nachrichten)