(Bugenhagen 1537 noh Lucas Cranach den Öllern un Hiob vun Chagall)

DE KENNUNG - 33. Jahrgang - Heft 1

DE KENNUNG : Zeitschrift für plattdeutsche Gemeindearbeit liggt beeten looter as süss op’n Disch. Op’n Ümslag steiht „33. Jahrgang - Heft 1“. Man de Ruutgeebers hebbt beslooten: de 184 Sieden tellt för den heelen Johrgang (tominnst tweemool 80 oder eenmool 160 Sieden).

Dat Heft hett twee Häufttheemen: „Johannes Bugenhagen“ un dat Bibelbook Hiob. De Bidrääg to Johannes Bugenhagen (1485 – 1558) sünd en Nohdrag to den nedderdüütschen Reformator sien’ 450. Doodesdag. De Griepswohlder Karkenhistoriker Irmfried Garbe foot „Drei Jahrzehnte Bugenhagen-Forschung : Erträge aus den Jahren 1986 – 2008“ tohoop (S.13-47; veel Literatuur-Henwiesen). Hans-Günter Leder (freuher ook Griepswohld, man 2006 storben) schreev noch en Opsatz ünner de Öberschrift: „Johannes Bugenhagen : Der heimliche Bischof der Reformation“ (S.49-68).

To „Hiob“ gifft dat en grooten praktischen Deel mit Materiool för de Arbeit in de Gemeen: „Troost för Hiob : Teksten för Gottsdeen-sten : Book un Minsch“ (S.90-133), man ook noch twee weetenschopli Opsätz. Tanja Pilger (Berlin) schrifft to „Erziehung und Befreiung zum Gottesbild im Hiobbuch: ausgehend von den Elihu-Reden in Hiob 32 – 37“ (S.69-78) un Bernd Jörg Diebner op Platt to „Hiob sien ,Ungerechtigkeit’ in Gott Sien Oogen – un Hiob sien ,Gerechtigkeit’ noh dat jöödsche Gesetz“ (S.79-88), beide Opsätz as Vöödrääg hoolen bi de „Plattdüütsche Dagfohrt in’n Pastoralkolleg Loccum“ 2010.

In’n Heft steiht noch veel wat Anners, deelwies spooßhaft to leesen. – Heft 34 sall ook wedder en Duppelheft warrn un to rechte Tiet för’n Düütschen Evangeelschen Karkendag in Dresden (1. – 5. Juni 2011) ruutkoomen.

(Bernd Jörg Diebner)

Bestellung an: A. Christians-Albrecht, Rhedener Straße 25, 31303 Burgdorf