„Plattdüütsch Besökerabend in't Landeshuus in Kiel"

Jedeen Maand könnt sik de Lüüd dat Gebüüd ankieken, woneem de Sleswig-Holsteensche Landdag to Huus is. Bi'n Besökerabend warrn se wies, woans dat utsüht in'n Plenarsaal un in anner Rüüm - könnt sik den Paternoster ankieken un utprobeern. Se hört de Geschicht vun dat Gebüüd, un se leert, wat dat op sik hett mit dat Gesetzemaken un de Arbeid vun de Afgeordneten.

Dreemal in't Johr gifft dat en Föhrung ok op Platt. - Nu is dat wedder sowiet: An'n Maandag, den 5. September 2011, Klock söß (18 Uhr) laadt de Landdag wedder in to en Besökerabend op Platt. Volker Holm stellt dat Huus vör, wiest den Plenarsaal un anner Rüüm un verkloort de Arbeid vun dat Parlament. Dat duert en gode Stünn.

Anmellen mutt een sik nich, man den Utwies schulln de Besöker dorbi hebben.

(www.sh-landtag.de) - (Volker Holm, Tel. 04102-4739108)  

Foto: Carsten Langner / eyekey design