Plattdüütsch Bökerharvst

Nieges vun den Quickborn-Verlag: „Hör mal ’n beten to!“

Yared Dibaba: Mien Welt blifft Platt

He reist jümmers noch dörch de Welt un besöcht de Plattdüütschen, de dat in de verscheden Kontinenten geben deit. Man he höllt ok de Ogen op in sien Naverschap. Un he vertellt vun siene Belevnisse mit de Minschen ümto. Heimat mutt een in sik sülben hebben, seggt Yared Dibaba, denn finnt een sik ok in de wiede Welt torecht. In’t Radio vertellt he dorvun in siene „Hör mal ’n beten to“-Geschichten. Dat möögt de Lüüd. Un wenn se dat ok lesen wüllt un könnt, denn so is dütt dat richtige Book för ehr. 30 kotte „Vertell“-Geschichten sünd dor binnen.

Yared Dibaba:

Mien Welt blifft Platt

Hamburg 2011

Quickborn-Verlag
ISBN 978-3-87651-357-7

6.80 EUR

Matthias Stührwoldt: Lever he as ik!

He vertellt vun de Lebber weg, wat em jüst in den Kopp kümmt. Un dat is allens, wat en Keerl, de op’t Land to Huus is, so angeiht: De Bull, de füünsch worrn is, de ole Transit, de an’t Uteneenfallen is, ole un junge Buern, de plattdüütsche Koh un anners wat. Dat sünd ganz ehrliche Alldagsgeschichten, mal en beten wat sinniger, mal en beten klamaukig, mal en beten wat schmuddelig. Wenn he dat op de Bühn vertellt oder in’t Radio, denn smustergrient de Tohörers. Wenn een dat as Bookgeschicht lesen deit, denn markst du gau: Hier wiest sik de Alldagsspraak vun en Plattschnacker: mit veel Hochdüütsch dor binnen un wenig Vermaak för’t Schrieben na en Regelwark. Man wat schall't, wenn’t gefallen deit.

Matthias Stührwoldt:

Lever he as ik!

Hamburg 2011

Quickborn-Verlag

ISBN 978-3-87651-359-1

6,80 EUR