Adschüß Huus Meckelborg !

17 Johr is Huus Meckelborg in Ratz’borg dat Tohuus vun dat Plattdüütschzentrum ween. Nu geiht dat to Enn. De Stiften Meckelborg, de dat ZfN 1994 in’t Huus holt harr, is na Schwerin trocken, un so is ok för dat Plattdüütschzentrum Afscheed anseggt.

Wi hebbt veel beleevt in dat ole Huus: Den Ratz’borger Klönsnack an’n Sünndag hebbt wi jedeen Maand dor maken kunnt. Alle twee Johr is de Landdagspräsident kamen to en Adventsfier op Platt. Mennig en plattdüütschen Avend mit plattdüütsche Karkenlüüd hebbt wi hat un bunte Namiddage för Kinner. Vele junge Schoolmestersche un Schoolmester hebbt hier lehrt, woans se Plattdüütsch in de School insetten könnt. Un mennig een Ledermaker hett uns in’n Reutersaal ünnerholen. Düt un noch veel mehr weer anseggt bi’t Plattdüütschzentrum in dütt Huus.

Nu hebbt wi all unsen Kraam utrühmt un wegfohrt. In de Ratz’borger St.-Georgsberg-School hett dat ZfN en Ruum funnen, woneem allens ünnerbröcht warrn kunn. Dorbi hett de Börgermester holpen. Nu mutt noch en beten Ordnung schafft warrn mang all de Kartons, de dor rümstahn doot, dormit de Arbeid wiedergahn kann.

Aver över’t Johr schall dat denn en niege Heimat geven för dat Plattdüütschzentrum op de Altstadtinsel vun Ratz’borg. Denn heet dat wedder Inpacken un Ümtrecken, man dorop freit wi uns al.

Op’t Letzt warrn nu de Schiller bi’t Huus Meckelborg afmonteert, un an’n Freedag, den 9. Dezember 2011, Klock 4 an’n Namiddag gifft dat noch en Afslussveranstalten vun de Stiften Meckelborg in'n Reutersaal.

http://www.stiftung-mecklenburg.de/index.php?option=com_content&view=article&id=124%3Amecklenburger-sagen-danke&catid=40%3Apublikationen&Itemid=70

 (Zentrum für Niederdeutsch - Landesteil Holstein - www.niederdeutsch-zentrum.de)