Volkert Ipsen: „Tüüssadüüss“

(PN) Anfungen harr dat mit en Kunzertoptritt in’n Hamborger Lichtwarksaal. Dor, wo jedet Johr de Plattdüütsche Bökermess afholen ward, dor, wo vördregen dörf, keen sik bi de Plattdüütschen al en Naam maakt hett. Un nu he: „Volkert Ipsen singt und spielt aus seinen Werken“. Vull weer de Saal nich, man vele Frünnen weern kamen, vele, de em al lange Johren kennen doot un de siene Leder jümmers wedder geern hören möögt. Un he hett vertellt, woans dat weer, as he anfungen hett un woans dat wiedergüng un so mennig en Komödi ut sien Ledermakertiet.

„...As ik de anner Morgen waken wurr, keem mi dat in een Nu an, ik schull ,mien Frünne’ vun de wiete Weg vertellen, de ik mit mien Musik gahn bün, nich blots de fröhligen Stücken vun Vico Torriani un de Caballeros vun’t Fernsehen, de ik in’n Lichtwarksaal vertellt harr, nä, dat Ganze, wat um un bi 50 Johr utmaken deit, wat anfung in een Kinnerstuuv op Nordstrand un sik hentruck bit na een Kummerkamer in de Giebelstadt.“

So füng he dat Schrieben an, dat em nu nich mehr losleet, bit dat Manuskript trech weer. De Fru an sien Siet, sien schmucke „Muse“, as he seggt, hett holpen, dat dor denn en richtig Book mit 212 Sieden ut worrn is.

Wo weer dat mit de „Nordstrander Landgewinnungsmaschin“, de Musik maken kunn, un worüm müss dat Klaveer in’t Water stahn? Un keen weern de Musiker-Kollegen, de em bemött sünd in sien Ledermakerkarrier, de lang weer, man liekers nich op’t hoge Podest föhren dee?

Erinnern an schöne Beleevnisse vun Kinnertiet un Fründschaft, vun lütt beten Showglanz in’t Musikgeschäft, man ok Vertellen vun Kummer, Wehdaag un Vertwiefeln. Dor geev de Musik Hölp, wenn de egen Lüüd nich stütten kunnen, wenn de Heimat nich mehr Tohuus weer, wenn wedder en Droom as en Sepenblaas an’t Platzen weer. Un dat geev jümmers en Droom vun’t grote Glück, man dat weer so wiet weg! „Tüüssadüüss“ - en Book vun’n Afscheed. Den een un annern Droom, den gifft dat nu nich mehr. Man de Poet un Ledermaker, de is noch dor, sitt in sien Stuuv in de Giebelstadt. Mit Gitarr un Piano. He schickt siene Gedanken un Leder rut in de Welt. Un de kann jedeen hören un lesen:  http://mienleeder.blogspot.com   

„Warrt nich veel plattdüütsche Böker geven, wo een so as Volkert Ipsen in moderne, natürliche un frische Plattdüütsch ehrlich vun sien Leven vertellt un en grote Bogen sleiht vun de Süsstiger Johrn bit na hüüt un dorbi jüst so veel fröhlig Stücken as trurig Momenten erinnern deit.“

Volkert Ipsen:

Tüüssadüüss. Mien Leedermaker-Leven twischen Kinnerstuuv un Kummerkamer.

TIET FÖR PLATT-VERLAG, Hamburg 2011

ISBN 978-3-9814757-08

15 Euro

bei tietfoerplatt@web.de / Tel. 040/87971836 (AB)

oder www.plattschapp.de

(mehr über Volkert Ipsen: http://www.zfn-ratzeburg.de/autoren/volkert_ipsen.htm)

(PLATTNET-Nachricht)