Hartmut Cyriacks un Peter Nissen kriegt den Quickborn-Pries

vun de Sporkassenstiften Neddersassen för 2012

Hartmut Cyriacks un Peter Nissen vun de Textmanufaktur in Hamborg ward mit den Quickborn-Pries vun de Sporkassenstiften in Neddersassen för 2012 uttekent. För den Pries gifft dat 2.000 Euro. He ward all twee Johr vergeben.

Fierlich in de Hand drückt ward de Pries an’n 2. Juni 2012, vörmiddags Klock 11, in’t Freelichtmuseum an'n Kiekebarg in de Horborger Bargen. De Loffreed höllt Gerd Spiekermann vun'n NDR in Hamborg. En Vertreder vun'n Vörstand bi de Spoorkass Horborg-Buxthuud ward den Pries öbergeben.

De Textfanufaktur in Hamborg-Ottensen, de Hartmut Cyriacks un Peter Nissen 1994 gründt hebbt un wo se gemeensom Baas sünd, öbersett un öberdriggt in Platt un hett sik öber de Johren eenen goden Nomen mookt. Allens, wat se vör de Hand kriegt, hett beste Qualität. De beiden sünd ok as Dramaturgen un Autoren ut de böberste Schuuv!

Hartmut Cyriacks stammt ut Achim bi Bremen un hett in Brunswik Geschichte un Ingelsch studeert, Peter Nissen stammt ut Bordelum/Borlem in Noordfreesland und hett in Kiel Ingelsch, Philosophie in freessche Philologie studeert. De beiden hebbt bet 1994 as Dramaturgen an’t Ohnsorg-Theoter in Hamborg arbeidt. Vun de Tied op an hebbt se vele Böker, Theoterstücken un Texten för Radio un Feernsehn bearbeidt un öbersett. Ok Comics as „Mit Käpten Donald op hoge See” oder „Asterix. De Törn för nix”. Se schafft dat, as mit de Öbersetten vun 2 dicke Böker öber “Harry Potter“, jümmer wedder ok Kinner an’t Plattdüütsch ran to bringen un jüm för disse Sprook to interesseren.

Mit „Ünner den Melkwoold”, een Speel för Stimmen vun Dylan Thomas, hebbt Cyriacks un Nissen al vör Johren een Bispeel sett, woans in Form un Sprook mit Plattdüütsch ümgohn warrn kann. Beter geiht nich! Letzt Johr hebbt se den “Sommernachtsdroom” vun Shakespeare för de Premiere an’t nee Ohnsorg-Theoter in't Bieberhus bistüert. Ok de plattdüütschen Folgen vun „Büttenwarder“ stammt vun jüm. So as de „Sprookföhrer Plattdüütsch“ or „2000 Wöörd Platt“.

Egol, wat Cyriacks un Nissen eenen Text öbersett, wat se de Norichten op Platt för NDR 90,3 öberdräägt, den Lokoldeel in’t „Hambörger Obendblatt“ schrievt or för de Bühn öberdräägt – jümmer steiht för jüm bobenan, wat de Minschen, de Platt kinnt un snackt, gode Texten un gode Literatur an de Hand kriegt. Op de Oort behöllt de ole Sprook ok in uns’ Tied Leben un Weert.

De Quickborn-Pries vun de Sporkassenstiften Neddersassen ward no de Satzung „für besondere Leistungen auf dem Gebiet der niederdeutschen Sprache, Literatur oder volkskundlichen Forschung“ utgeben. Insett wöör de Pries al 1960 vun „Quickborn, Vereenigung för Nedderdüütsche Sprook un Literatur e.V.“ , in Hamborg.

(Quickborn-Vereinigung / Niedersächsische Sparkassenstiftung - Foto: Werner Struss)

________________________________________________________________________________________________________________________________________________________________________________