PLATTNET-Nachrichten 26.02.2012
PLATTNET
Böker-Tipp
Annemarie Jensen: Plattdüütsch
leevt
Gedanken över plattdüütsche
Wöör
(pn)
Egentli liggt ehr dat Snacken un Vertellen mehr as dat Schrieven un Lesen.
"Liekers, as dat denn heten dä, för de Zeitung eenmal in'e Wuch wat op
Plattdüütsch schrieven, heff ik foorts bilangt. Sodennig kunn ik je mit de
Zeitungslesers in't Snacken kamen. Ik dachte dorbi an Lüüd, de, so as ik, leefst
Plattdüütsch snacken mögen, un an so'n, de noch nich so firm dorin sind. Denn
kunn ik Lüüd anspreken, de geern mal över plattdüütsche Wöör un Snacks nadenken
doon, un so'n, de wat för de Theorie vun de Spraak över hebben. Mit de Kolumnen
kunn ik de Lesers mien Gedanken un Fragen to't Plattdüütsche tostüern un
villicht Antwoort un Anregens torüüchkriegen." Un so is dat kamen: Jedeen Week
schrift Annemarie Jensen för dat "Flensburger Tageblatt" en
Kolumne, in Platt un över Platt.
Dor
geiht dat üm enkelte Wöör un ehr Schrievwies, üm Snacks un Seggwiesen, man ok üm
Tradition, Volkskunn un allens dat, wat de Autorin jüst in den Sinn kommen
deit. Dat mag denn ok mal üm en plattdüütschen Schrieversmann gahn as Hermann
Claudius, üm dat Brevenschrieven oder de Flensborger Kulturpolitik.
Dorbi
geiht se geern in op dat, wat Lesers ehr in Breven un E-Mails fragen un
antern doot. Un so is meist vergeten, dat se egentlich plattdüütsche Wöör
vun A bit Z verklaren wull: Dor is se na een Jahr nich wiet kamen! Man se is
in'n regen Uttuusch mit ehr Lesers. De sitt mennigmal wiet weg irgendwo op de
Welt un hebbt de Kolumnen in de Online-Utgaav vun de Zeitung tofaten kregen.
Annemarie Jensen schrifft ehr Texten in Flensborger
Platt, un se wiest dorbi, dat een sik ok an de Schrievregeln vun SASS holen
kann, wenn een nich jüst in't Holsteensche to Huus
is.
Dat
gifft en Barg to weten över de Spraak, un de Autorin kann wunnerbor eenfach
vertellen un verklaren, ok wenn dat üm komplizeerte Grammatikfragen geiht.
Un se wiest uns dorbi jümmers wedder: Plattdüütsch
leevt.
Nu sünd
de plattdüütschen Kolumnen vun Annemarie Jensen as Book rutkamen, bunt een na
eenanner, so as in de Zeitung. Fein to lesen un allerhand to lehrn över
Plattdüütsch.
Annemarie
Jensen:
Plattdüütsch
leevt
Gedanken över plattdüütsche
Wöör
Husum
Druck- und Verlagsgesellschaft, Husum
2012
ISBN
978-3-89876-597-8
115 S.;
8,95 Euro
___________________________________________________________________________________________________________________________________________________________________________________