„Ik bün Hipp-Hopp - du
Fischkopp!“ - De CD to dat Heft!
(pn) Hipp-Hopp is en echten Schillerfisch. Nich blots,
dat sien Schuppen as dull schimmern doot - he snackt sogoor jüst so as de echte
Dichtersmann Schiller in Riemels! He wohnt in en ole
Cola-Doos op’n Sandkamp in’t Water. Dor is
düchtig wat los! En groot Verbreken mutt opdeckt warrn. De scheune un rieke Hai
Diklump is en grote Perl vun ehr Kroon klaut worrn. Dat is en Fall för Sheriff
Kaschotti! Man opklaarn deit de Saak de lütte Hipp-Hopp. He is de Held vun de
lütt Geschicht, de Christianne Nölting sik utdacht hett un to de Nicola
Ashtarany de Biller maakt hett.
„Ik bün Hipp-Hopp - du Fischkopp!“ is
en vun de niegen Böker to’n Plattdüütsch-Leern för Kinner, de bi’n
Quickborn-Verlag ruutkamen sünd.
De Kinner in de School möögt düsse
Geschichten, un in de Grundschool Steinkirchen sünd se bigahn un hebbt en
Plattdüütschprojekt dorut maakt, bi dat de Jungs un Deerns de enkelten Deerten
in’t Water en Stimm geben hebbt. So is dor en lütt Höörböök ut worrn, dat ok för
anner Lüüd wunnerbor antohören is. Mit Rolf-Dietrich Wahlen gifft dat en
utwussen Plattsnacker as Verteller, man de verscheden Fisch warrn vun de Kinner
sproken. Allens is mit veel Sachverstand
produzeert.
De Quickborn-Verlag, de Modern Music
School Stade un de Landschaftsverband Stade hebbt mitmaakt un so kann een dat nu
köpen, anhören un namaken:
„Ik bün Hipp-Hopp - du
Fischkopp!“
En Geschicht vun Christianne
Nölting
mit Biller vun Nicola
Ashtarany
Quickborn-Verlag Hamburg
2011
ISBN
978-3-87651-353-9
Dorto „De CD to dat Heft!“
Allens tosamen: 8
Euro
Jedereen kann dat Book un de CD köpen un mit sien
Kinners lesen un hören. Verköper sünd: Buchhandlung Vollmer (Steinkirchen),
Schütt Elbkinderparadies (Grünendeich), Bücherstübchen (Jork), Contor
Buchhandlung (Stade), Altländer Drogerie Hubert (Jork), Tourismusverein Altes
Land e.V. (Jork), Museum Altes Land (Jork), Sparkasse Stade-Altes Land un Der
Elbfischer Lothar Buckow (Wisch, Jork). Oder he kann sik bi de School melden:
www.grundschule-steinkirchen.de
Dor sünd se düchtig mit Plattdüütsch
ingang!
(PLATTNET-Nachrichten)
_____________________________________________________________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle
Nachrichten unter http://archiv.plattnet.de/
PLATTNET.de ist ein Dienst des Zentrums für Niederdeutsch in Holstein (www.niederdeutsch-zentrum.de)
Wer in Zukunft keine E-Mail-Informationen von
PLATTNET haben möchte, den bitten wir, uns das in einer kurzen Nachricht
mitzuteilen: nieges@plattnet.de