Grote Truer üm Ingobert Andresen – wi denkt
torüch
As de Naricht keem, kunn dat keeneen
glöven: Ingobert Andresen, Vörsitter vun den Bieraat för Nedderdüütsch vun de
Stadt Kappeln, is nich mehr ünner uns. Andresen, fröher mal Schoolmeister, hett veel beschickt för de
plattdüütsche Spraak – un dat wiet över Kappeln rut. Den „Kappelner
Literaturpries“ hett he in enge Tosamenarbeit mit den Sleswig-Holsteenschen
Heimatbund in’t Leven ropen un över de Johren to enen heel wichtigen Pries för
de plattdüütsche Spraak un Literatur in ganz Noorddüütschland maakt. Gespannt
kickt de plattdüütsche Welt jedes Johr in’n November hen na
Kappeln.
Dat Plattdüütsch in Kinnergoorn un
School en Thema blifft, hett Ingobert Andresen immer an’t Hart legen. So hett he
tosamen mit den Bieraat Fortbillens organiseert. Wiederhen denkt wi geern an
vele Leesavende mit plattdüütsche Schrieverslüüd in’t Christopherus-Huus un in
de Stadtbökerie torüch.
Dat schall wiedergahn mit Platt in
Kappeln un mit den Literaturpries – dat is verspraken! Wi denkt torüch mit Truer
un mit groten Dank för all sien Arbeit.
Ingobert Andresen storv bi en Besöök in
Ustka/Stolpmünn, dor wo he 1940 op de Welt kamen is. Wi geevt em de letzte Ehr
an’n Middeweken, 16. Mai 2012, nameddags Klock twee in de Nikolaikark in
Kappeln.
Sleswig-Holsteensche Heimatbund - www.heimatbund.de
_________________________________________________________________________________________________________________________________________________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle
Nachrichten unter http://archiv.plattnet.de/
PLATTNET.de ist ein Dienst des Zentrums für Niederdeutsch in Holstein (www.niederdeutsch-zentrum.de)
Wer in Zukunft keine E-Mail-Informationen von
PLATTNET haben möchte, den bitten wir, uns das in einer kurzen Nachricht
mitzuteilen: nieges@plattnet.de