31.05.2012 - (12036) Regionalschule Niebüll wird modellhafte Plattdüütsch-School
 
                    PLATTNET-Nachrichten  31.05.2012
 
    
                     
 

Modellschool Plattdüütsch

An de Regionalschool Niebüll könnt de Kinner Plattdüütsch lehrn 

 

(pn) Plattdüütsch in de School? An de Regionalschool Niebüll (Nordfreesland) is dat Programm!

In de 5. un 6. Klass könnt de Kinner in den Wahlplichtberiek Plattdüütsch lehrn. Dorför gifft dat de „Sprachenklasse-kreativ“. Sünnerlich över dat plattdüütsch Theaterspelen warrn de Jungs un Deerns kunnig maakt mit de Regionalspraak. Un dor kümmt jümmers wat Grootardiges bi rut: Tweemal is de School uttekend worrn mit dat Siegel „Plattdüütsche School“, un ok de niege „Emmi för Plattdüütsch“ is düt Schooljohr an de Regionalschool Niebüll gahn. Dat de School sik so vörbildlich för de plattdüütsche Spraak insetten deit, dat is vör allen Dingen de Schoolmestersche Malene Gottburgsen to verdanken. Se is al vele Johren engageert dorbi, de Kinner Plattdüütsch bitobringen.

Nu schall de School Modellschool för Plattdüütsch warrn, dat heet, dat gifft Ünnerstütten för de Arbeid vun’t Kieler Bildungsministerium: Extrastünnen för den Insatz vun de Schoolmestersche un en finanziell Polster för besünnere Utgaven un Projekte. Twee Johr lang ward nu keken, woans sik de Ünnerricht wieder entwickeln deit. Lüüd vun de Uni in Flensborg warrn dorbi ween, un Hölp gifft dat ok vun dat Plattdüütsche Zentrum in Leck. An’t Enn ward dat en Dokumentaschoon geben, dormit villicht ok anner Scholen na dat Bispill Plattdüütsch ünnerrichten künnt.

Jan Stargardt vun’t Bildungsministerium in Kiel, Ingwer Oldsen vun’t Plattdüütschzentrum in Leck un Volker Holm vun’t Nedderdüütschzentrum in Ratzeborg weern na Niebüll kamen, üm dat mit Schoolmestersche Malene Gottburgsen, Schoolleiter Hans-Ferdinand Sönnichsen un Börgermester Wilfried Bockholt to beschnacken un perfekt to maken.

Achteran geev dat noch en plattdüütschen Avend mit Kinner un Öllern, wo de School ehr plattdüütsch Aktivitäten wiesen kunn. Dorbi hett de Stiftung "Mien Moderspraak" Geldpriesen geven an Scholen, Kinnergorns un Theotergruppen för ehr Plattdüütscharbeid. De Regionalschool Niebüll worr mit 500 Euro bedacht.

(http://rs-niebuell.lernnetz.de/)

_______________________________________________________________________________________________________________________________________________________________________

 

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de  ist ein Dienst des Zentrums für Niederdeutsch in Holstein (www.niederdeutsch-zentrum.de)  

PLATTNET.de  Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de