(12075) Bericht vun de 65. Bevensen Dagfahrt

65. Bevensen Dagfahrt -

(Wat de, de nich dorbi weern, allens verpasst hebbt)

De 65. Bevensen Dagfahrt - Jahrestagung für Niederdeutsch - is to End. Dree Daag lang hebbt sik de Plattdüütschen - sünnlich Schrieverslüüd, man ok anner, de sik för plattdüütsche Kultur interesseern doot - in de Kurstadt Bad Bevensen („Bäämsen“) drapen. Dat geev en heel feines, „moies“ Programm to beleven: „Vun Minschen un Deerten“.

Mit Plattdüütsch-Ünnerricht („Brummer Hinnerk“) un Plattdüütsch-Theater („Petterson und Findus“) för Kinner fung dat mit düt Motto an. Heidrun Schlieker un Ingrid Straumer weern in twee Scholen togang un de Theaterspelers kemen in’t Kurhuus. Ehr Theaterstück weer ganz wunnerbor un mit veel Leev för’t Detail inszeneert vun de Fritz-Reuter-Bühn in Schwerin. Denn geev dat fabelhafte Fabelgeschichten un Leder vun Hayo Schütte un sien Dochter Rika Tjakea mit de Grupp „Swing op de Deel“ to hören un an’n ersten Abend en Vördrag vun Dr. Ulrich Weber (Universität Kiel) över de Texttraditschoon „Reynke de Voss“. Dat weer heel goot to verstahn un to begriepen.

An den tweten Dag weer toerst de Johreshauptversammeln. De Vörstand harr sien Arbeid goot maakt. Dorüm hebbt em de Vereensmaten ok glieks wedderwählt. Denn hett de Plattdüütschbeopdragte vun Celle, Jürgen Heitmann, sien Arbeid verklort, bevör Dr. Reinhard Goltz un Christiane Ehlers vun’t INS in Bremen den plattdüütschen Bundesraat vörstellen deen. Sprakenpolitik - dor wüllt de Plattdüütschen nich so geern ran. Man liekers is dat wichtig, un so kümmert sik de Bundesraat för Nedderdüütsch dorüm. In’n Momang dreiht sik dat üm Plattdüütsch as „Immaterielles Kulturerbe“. - Över den Töllerrand kieken kunnen de Besökers bi den Vördrag vun Henk Scholte över den plattdüütschen Kulturbedriev in’t Groningerland. Wat kann de Keerl de Lüüd begeistern! - Wieder gung dat an’n Namiddag mit plattdüütsch Vörlesen „Op de Kist“. 13 Fruuns un Mannslüüd sünd op de bunte Kist in’t Kurhuusfoyer kladdert un hebbt veer Minuten Tiet hatt, en lütt beten sülvst schreben Poesie vörtolesen. Dat weer goot antohören, mennigmal mit veel Pläseer. - Wedder in’n Saal güng dat üm veer plattdüütsche Böker, de dat „Literarische Kleeblatt“ vörstellen dee: de Anthologie „Över’t Land in Schleswig-Holstein“, den Roman „Gretiene“ vun Hilde Frauke Wichmann-Steen, dat Nakieksel-Book „Bösselkatrien heet mien Swien“ vun Theo Schuster un de Vertellen „Jakob sien Geschichten“ vun Reimer Bull. Dorbi hebbt de Tohörers en goden Indruck vun de veer Böker kriegen kunnt. - Den Afsluss vun düssen Dag hett de Nedderdüütsche Bühn Kiel maakt mit twee Eenakters vun Anton Tschechow: „Der Bär, dat Beest vun Kerl / Een Heiratsandrag“. De Tokiekers in’n Theatersaal hett dat Stück, dat Frank Grupe in’t Plattdüütsche översett harr, allerbest gefullen: Godes Stück, perfekt speelt un wunnerbor utstaffeert.

An’n drütten Dag drapen sik de Lüüd - so as dat Traditschon is bi de Bevensen-Dagfahrt - in de „Dreikönigskirche“ to’n plattdüütschen Gottesdeenst. De worr mit Pastor Siek Postma fiert. Sünnerlich sien feine Predigt hett de Besökers gefullen. - To’n Utklang vun de Dagfahrt geev dat denn noch en letzten „Höhepunkt“: De Priesvergaav vun den „Bad Bevensen Preis 2012“. Düssen Pries gifft dat för „vokale und instrumentale Gestaltung und Interpretation niederdeutscher Texte“ vun de Stadt Bad Bevensen un de Börgermester Martin Feller hett em de Priesdrägers övergeben. Dat weer dütmal dat „Otto Groote Ensemble“, blangen Otto Groote siene Frünnen Matthias Malcher und Ralf Strotmann. Vereensvörsitter Carl-Heinz Dirks un Laudator Henk Scholte hebbt ehr vörstellt. Un denn hebbt se sik bedankt mit en lütt Konzert. Dor kunnen all Tohörers Bispillen ut ehr plattdüütsch Folkmusik-Programm beleben.

Dree Daag Bevensen-Dagfahrt - dat is jümmers dree Daag plattdüütsches Programm in verscheden Art un Wies; dat is dree Daag Drepen mit Plattschnackern ut de verscheden plattdüütschen Regionen; dat is dree Daag Klönschnack mit Frünnen - bi’t Etengahn, in de Pausen an Heiko Freese sien Bökerdisch (www.plattschapp.de) un bi’n Utklang an’n Abend in’t „La Stella“.

Andreas Springer vun de Stadt Bad Bevensen un annere hebbt vele Fotos maakt. De besten sünd to finnen op de Facebook-Siet vun den Vereen:

http://www.facebook.com/pages/Bevensen-Tagung-eV-Niederdeutsche-Dichtertagung/190660200964946

Tokamen Jahr dreept wi uns wedder to de Bevensen-Dagfahrt - an’n 13.-15. September 2013. De Vörstand ward wedder för en attraktives Programm sorgen, dat de Lüüd geern na de Heidestadt kamen doot. http://www.bevensen-tagung.de

(Volker Holm)

__________________________________________________________________________________________________________________________________________________________________________________________________________________________________________________________________________

PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de Nachrichten-Archiv: alle Nachrichten unter http://archiv.plattnet.de/

PLATTNET.de ist ein Dienst des Zentrums für Niederdeutsch in Holstein (www.niederdeutsch-zentrum.de)

PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de