30.12.2012 - (12134) Twüschen de Johren

 

 

Twüschen de Johren

 

(pn) De Tiet twüschen dat ole un dat niege Johr - Ups! - wat schall dat denn sien?

Wenn wi na de Bedüden kieken doot, denn lehrt wi, dat dormit fröher de Tiet vun de Raunachten, de twölf Nachten vun de Wintersünnenwenn bet na Epiphanias an’n 6. Januar meent weern. Twüschen de Johren - dat keem dörch de Ümstellung vun den julianischen op den gregorianischen Kalenner, dor güng dat en beten dörcheenanner mit de Festdagen un den Johrswessel ... Twüschen de Johren - dat weer för de Christen de Tiet twüschen de Hillige Nacht un dat Dreekönigsfest. Twüschen de Johren - dat is hüüt för de Minschen de Tiet twüschen Wiehnachten un Niejohr.

Jümmers is in düsse Tiet twüschen de Johren en Barg Spökenkiekeree begäng ween: Nis Puk, de Huusgeist, worr begöscht mit lecker Eten, de bösen Geister worrn verdreben mit veel Larm bi’t Rummelpottlopen un de Dören dichthollen, dormit Düvel un Hexen buten bleben. Ok hüüt noch höllt sik de een un anner doran, dat twüschen de Johren keen Wäsch op de Lien bummeln dörf ...