04.01.2013 - (13004) Tiet för Fruuns-Vertellen

 

 

 

„Mit Plüschmoors, Meta un Meryem in’t niege Johr!“

Tiet för Fruuns-Vertellen

 

(pn) En besünner Book is siet den verleden Harvst op den plattdüütschen Bökermarkt: „Plüschmoors - Gedichten un Geschichten“. Rutgeven hett dat de Hamborger Plattdüütsch-Dozentin Evelyn Röhe mit ehren niegen Verlag „Tiet för Platt“. Bi dat Söken vun hüütige Texten weer ehr opfullen, dat dat en Barg Fruenslüüd gifft, de plattdüütsch schrieben doot - man in Böker sünd de Gedichten un Geschichten mehrstendeels nich to finnen. Dorüm weer nu „Tiet för Fruuns-Vertellen“! Ölben Fruunslüüd ut Norddüütschland hett de Verleggersche funnen, mit de se dat Book maken kunn, vull Moot un Toversicht.

Dreeunfofftig Texten sünd in de Anthologie binnen, heel ünnerscheedlich: mal to’n Nadenken un Trurigween, mal to’n Smustern un Lachen, mal to’n Gefallen un mal to'n - naja! Is eben ok en beten Geschmacksaak... Insgesamt is dat ober en godes Book worrn. An’n besten hebbt mi de eernsthaften Texten vun Marlou Lessing, Anetta Schulz, Petra Wede, Anke Nissen un Stina Nissen gefullen  - un dat sünd en ganzen Barg.

„Reinweg versupen kann ik in de Geschichten un Gedichten ...“ schrifft Marianne Ehlers in ehr Wöör vörweg. Dat kann ik nu jüst nich seggen - ober ik bün ja ok bloots en Mannsminsch!

Plüschmoors

Gedichten un Geschichten

Tiet för Platt Verlag, Hamburg 2012

ISBN 978-3-9814757-1-5

11,90 Euro

E-Mail tietfoerplatt@web.de

mit Bidrääg vun Vera von Borstel, Dörte Burgemann, Heidrun Clausen, Gunda Gey, Martha-Luise Lessing, Elke Marx, Anke Nissen, Stina Nissen, Anetta Schulz, Petra Wede un Irma Wortmann.

An’n Middeweken, den 23. Januar 2013 sünd de Schrieverfruens to beleven bi den 105. Plattdüütschen Abend vun de Carl-Toepfer-Stiftung in’n Lichtwarksaal, Neanderstraße 22, 20459 Hamburg. (18.30 - 20.30 Uhr). Denn ward dat Book vörstellt un Gedichten un Geschichten vörleest: „Mit Plüschmoors, Meta un Meryem in’t niege Johr!“ - Mehr ünner: www.carltoepferstiftung.de

(Volker Holm - PLATTNET-Nachrichten) 

 

Besöök http://www.facebook.com/PLATTNET.de un wies uns, dat di PLATTNET.de behagen deit!