„Moin Moin!“ Lütte Lüüd
snackt Platt!
Afsluss vun den Kinnergoorn-Wettbewerb in’t Hertogdom
Launborg
All twee Jahr gifft dat in’t Hertogdom
Launborg en Wettbewerb för Plattdüütsch in’n Kinnergoorn. Ok düttmal is de Jury
ünner dat Leit vun de Kreisbeopdragte för de Förderung vun de plattdüütsche
Spraak in den Kreis Helga Walsemann bi all de Kinnergoorns west, de Freud an de
plattdüütsche Spraak hebbt un ok Moot harrn, sik för den Wettstriet antomellen.
Bi söss Inrichtungen harrn Kinner un Optreckersche sik veel Mööh geven mit dat
Instudeern un dat Butenkoppslehren vun plattdüütsche Leder un anner
Texten.
De Jury un ok de Besöök (ton Bispill de
Börgermeister, de Pastersche, de Reporters, de Vertreders ut de Gemeen, de Oma,
de Kreispräsident) harrn veel Freud an de lüchen Ogen vun de Kinner, ok an de
feine Kledaasch vun de lütten Theaterspelers, an dat Singen un de Musik dorto,
an den sülvstbackten Koken un de Tass Kaffee. Wenn dat buten ok noch kolt weer,
so keem ehr binnen glieks de Sünnenschien in de Mööt un maak de Harten warm. In
all Inrichtungen weren de lütten un groten Jungs un Deerns mit ganz veel Freud
an´t Wark. Dorför hebbt se ok all den „plattdüütschen Orden“
kregen.
De Afslussveranstalten vun dissen
Kinnergoorn-Wettbewerb is nu fiert worrn in ´t Augustinum in Mölln. Dorbi hebbt
de dree besten Gruppen ehr Programm öffentlich op de Bühne präsenteern dörft.
Dat weer en heel pläseerlich Veranstalten un de
Kinner hebbt fein wat wiest. Alle Kinnergoorns kregen en Urkunn vun den
Kreispräsidenten Meinhard Füllner, de de Schirmherr över disse Veranstalten is.
De dree Siegers hebbt babento en Plakett un en Paket mit plattdüütsches
Lehrmaterial kregen un ehre Kinner en lütt plattdüütsch Heft to ´n Lesen un
Anmalen.
Delnahmen un wunnen
hebbt:
Städtischer Kindergarten,
Ratzeburg
Kindergarten „Escheburger
Strolche“ e.V., Escheburg
Kindertagesstätte Regenbogen,
Geesthacht
Dat Plattdüütschforum Hertogdom
Launborg bedankt sik bi all de, de mitholpen hebbt, de Lütten unse ole Spraak
vörtostellen un hofft, dat dat Plattdüütsche so denn un wenn ok in de
Kinnergoorns höört un snackt warrt.
(Helga Walsemann, Plattdüütschbeopdragte)
Besöök ok http://www.facebook.com/PLATTNET.de un wies uns, dat di PLATTNET.de behagen deit!
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de ist ein Dienst des Zentrums für Niederdeutsch in Holstein (www.niederdeutsch-zentrum.de
)Wer in Zukunft keine E-Mail-Informationen von
PLATTNET haben möchte, den bitten wir, uns das in einer kurzen Nachricht
mitzuteilen: nieges@plattnet.de