PLATTNET - Böker-Tipp

Kalenner för de Tasch 2014

Op Platt dörch dat Johr

Nu is he endlich dor un ganz nie: De plattdüütsche Taschenkalenner 2014. Handlich un fein to bruken, as sik dat för en Terminkalenner hören deit: För jedeen Week gifft dat twee Doppelsieden mit Platz för’t Indregen elkeen Dag. Ok as lütt Daagbook fein to verwennen, wenn een keen Roman schrieven will. Lütte plattdüütsche Riemels, Wöörverklaren un en beten Heimatkunn is dor afdruckt - in ganz zorte Farv, dat du dor liekers mit dienen Stift överhen schrieben kannst, wenn dat veel to marken gifft. Dat is en ganz bunte Mischung vun Texten, oftmals hebbt se wat mit dat Datum to doon, woneem se hensett worrn sünd. En Prinzip is dorbi nich recht to finnen, man dorüm kann een ok en beten Spaaß bi’t Stöbern in dat Book finnen. Sogar en poor Termine ut dat plattdüütsche Kulturanbott in’t tokamen Johr sünd al afdruckt ! An’t Enn gifft dat noch en lütten Anhang: natürlich mit de Quellen vun de literarischen Texten in’t Book, en List vun plattdüütsche Kulturpriese un Adressen vun plattdüütsche Vereene un Institutschoonen - all vöran de Fehrs-Gill. In de ehr Edition Fehrs-Gilde is de Kalenner rutkamen bi den Wachholtz-Verlag in Niemünster. Un so is dat Book ok eher op Sleswig-Holsteen un Hamborg utricht.

Mennigeen mag dor wat vermissen un fraagt sik: Worüm steiht düt dor binnen un dat nich? Annerseen hett sik al lang op siene speziellen Kalennerböker un Terminplaners inricht un mag dor nich vun af un wedder een annern is glücklich mit sien Smartphone oder Tablet-PC. Dor ward dat sachs noch veel to bedenken geben, wenn dat 2015 wedder en Kalenner för de Tasch geben schull. Ik to’n Bispill mag dat handliche Format, haltbor bunnen mit afrund’te Ecken, dat feine, nich to dünne Papier, de angenehme hellgröne Farv, düchtig Platz to’n Rinschrieben. Wünschen do ik mi en Leesband, dormit ik de Siet mit de aktuellen Indräge lichter wedderfinnen kann - man dat maakt dat Dings sachs wedder recht wat düerer ... So hett dat en Pries, den ok anner Kalennerböker kosten doot.

Den Kalenner för de Tasch hebbt Marianne Ehlers (Texte), Christiane Ehlers (Layout) un Jan Buchholz (Cover) maakt. Dat weer to wünschen, wenn dat Book bi de Lüüd goot ankamen wörr.

De plattdüütsche Kalenner för de Tasch 2014

Wachholtz Verlag, Neumünster 2013

geb. 11 x 17,3 cm

ISBN 978 3 529 04927 9

12,80 Euro

(Volker Holm, PLATTNET.de)